មិនមានរបាយការណ៍អំពីពលរដ្ឋខ្មែររងគ្រោះពីភ្លើងឆេះព្រៃនៅអូស្រ្ដាលីទេ
នៅរយៈពេលថ្មីៗនេះប្រទេសអូស្ត្រាលី រងនូវការគំរាមកំហែងពីអាកាសធាតុក្ដៅខ្លាំងរហូតដល់ទៅជាង ៤០អង្សាសេនៅតាមតំបន់មួយចំនួន។
នៅព្រឹកថ្ងៃនេះ Radio Australia បានទាក់ទងសួរសុខទុក្ខបងប្អូនខ្មែរដែលរស់នៅតាមបណ្ដារដ្ឋនៅ ក្នុងប្រទេសអូស្ត្រាលី តាមរយៈសមាគមខ្មែរប្រចាំនៅរដ្ឋញូសាវែល, សមាគមខ្មែរនៅអូស្ត្រាលីខាងត្បូង និងពលរដ្ឋខ្មែរនៅរដ្ឋវិចថូរៀ បានឲ្យដឹងថា មកទល់នឹងពេលនេះការឡើងកម្ដៅខ្លាំង និងភ្លើងឆេះព្រៃនៅតាមតំបន់មួយចំនួននៅក្នុងប្រទេសអូស្ត្រាលីគឺ មិនទាន់មានព័ត៌មានស្ដីពីការរងគ្រោះដល់ពលរដ្ឋខ្មែរទេ តែមានការប៉ះពាល់ខ្លះទៅលើបងប្អូនពលរដ្ឋខ្មែរដែលទៅធ្វើការងារ ចំការ ពីព្រោះកម្ដៅខ្លាំងពុំអាចឲ្យពួកគេធ្វើការបានពេញមួយថ្ងៃ ហើយថ្ងៃខ្លះត្រូវម្ចាស់ចំការឲ្យឈប់សម្រាក។
ក្រុមពន្លត់ អគ្គិភ័យនៅតំបន់ជនបទនៃរដ្ឋ New South Wales បានឲ្យដឹងថា នៅក្នុងខណៈដែលកម្រិតភ្លើងឆេះមិនទាន់ដល់កម្រិតគ្រោះមហន្តរាយនៅ ក្នុងរយៈពេលប៉ុន្មានថ្ងៃទៀតនោះ ស្ថានភាពទៅទូទាំងរដ្ឋនឹងនៅតែស្ថិតក្នុងស្ថានភាពគ្រោះថ្នាក់ដដែល។
ក្រុមអ្នកពន្លត់អគ្គិភ័យកំពុងតស៊ូប្រយុទ្ធនឹងភ្លើងឆេះព្រៃជាង២០០កន្លែងដោយសារស្ថានភាពគ្រោះមហន្តរាយកាលពីថ្ងៃចន្ទ៕(Radio Australia)