រថយន្តដឹកដី កិនមនុស្សស្លាប់២នាក់ របួសធ្ងន់ម្នាក់
ភ្នំពេញ៖ កាលពីវេលាម៉ោង ១១និង៣០នាទី ថ្ងៃទី០៨ ខែមករា បុរស២នាក់បានស្លាប់បាត់បង់ជីវិតភ្លាមៗនៅនឹងកន្លែង ហើយម្នាក់ទៀតរងរបួសធ្ងន់ ដោយសាររថយន្តដឹកដីបុក ខណៈជនរងគ្រោះជិះម៉ូតូ នៅលើកំណាត់ផ្លូវចំការដូង ស្ថិតក្នុងភូមិរលួស សង្កាត់ជើងឯក ខណ្ឌដង្កោ ។
អ្នករងរបួសនៅក្នុងហេតុការណ៍លើនេះមានឈ្មោះ គុន នន ភេទប្រុស អាយុ២២ឆ្នាំ មានស្រុកកំណើតនៅភូមិច្រេស ឃុំច្រេស ស្រុកជុំគីរី ខេត្តកំពត ត្រូវបញ្ចូនទៅសង្គ្រោះនៅមន្ទីរពេទ្យមិត្តភាពខ្មែរសូវៀត។ រីឯអ្នកស្លាប់ សមត្ថកិច្ចកំពុងទំនាក់ទំនងរកសាច់ញាតិ ដើម្បីមកទទួលសពយកទៅធ្វើបុណ្យតាមទំនៀមទំលាប់ប្រពៃណីខ្មែរ។
ប្រភពពត៌មានទាក់ទិននឹងហេតុការណ៍ខាងលើនេះ បានឲ្យដឹងថា មុនពេលកើតហេតុ បុរសរងគ្រោះដែលស្លាប់២នាក់ និងរបួសម្នាក់ខាងលើនេះបានជិះម៉ូតូមួយគ្រឿង ម៉ាកសេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ ភ្នំពេញ 1BJ-2121 ជិះឌុបគ្នាទាំង៣នាក់ ធ្វើដំណើររួមគ្នាលើកំណាត់ផ្លូវចំការដូង ក្នុងទិសដៅពីត្បូងទៅជើង លុះដល់ចំណុចកើតហេតុខាងលើ ក៏បានបុកគ្នាជាមួយរថយន្តដឹកដីមួយគ្រឿងម៉ាក ហ៊ុយ ហ្ស៊ូ ពណ៌ស ពាក់ស្លាកលេខ បាត់ដំបង 3A-0285 ដែលបើកបរធ្វើដំណើរពីជើងទៅត្បូង (បញ្ច្រាសទិសគ្នា) បណ្តាលឲ្យម៉ូតូដួលខ្ទាតចូលក្រោមកង់រថយន្តទាំងមនុស្សទាំងម៉ូតូ ហើយត្រូវរថយន្តកិនស្លាប់២នាក់ របួសធ្ងន់ម្នាក់។
ក្រោយពេលកើតហេតុ អ្នកបើកបររថយន្តបង្កបានរត់គេចខ្លួនបាត់ ទោះជាយ៉ាងណានេះក្តី ក៏សមត្ថកិច្ចបានឃាត់រថយន្តបង្ក យកទៅកាន់ការិយាល័យជំនាញ ដើម្បីចាត់ការតាមផ្លូវច្បាប់៕
ដោយ៖ ហេង នាង
