គណៈប្រតិភូ ក្លិបអ្នកកាសែតកម្ពុជា បានជួបពិភាក្សាការងារជាមួយថ្នាក់ដឹកនាំសារព័ត៌មានវៀតណាមធំចំនួនបីក្នុងទីក្រុងហាណូយ

សារព័ត៌មាន​ Cambodia News/

ភ្នំពេញ ៖ រយៈពេលពីរថ្ងៃនៅក្នុងដំណើរទស្សនកិច្ចនាទីក្រុងហាណូយ នៅព្រឹកថ្ងៃទី១៦ ខែឧសភា ឆ្នាំ២០២៤នេះ គណៈប្រតិភូក្លិបអ្នកកាសែតកម្ពុជា (CCJ) ដឹកនាំដោយ លោក ពុយ គា ជាប្រធាន​ បានជួបពិភាក្សាការងារជាមួយថ្នាក់ដឹកនាំរបស់សារព័ត៌មានធំចំនួនបី៖ ទីភ្នាក់ងារសារព័ត៌មានវៀតណាម (VNA), កាសែតប្រជាជន (Nhan Dan) និងសមាគមអ្នកកាសែតវៀតណាម (VJA) ដោយផ្តោតទៅលើការផ្លាស់ប្តូរយោបល់លើបញ្ហាប្រឈមនៃសារព័ត៌មានប្រពៃណីក្នុងយុគសម័យឌីជីថល និងការប្រើប្រាស់បញ្ញាសិប្បនិមិត្ត (Al) ក្នុងវិស័យសារព័ត៌មានដែលប្រហាក់ប្រហែលនឹងកម្ពុជាដែរ។

នៅក្នុង​កំណើរទស្សនកិច្ចនោះលោក ពុយ គា បាន​កត់សម្គាល់ថា នៅវៀតណាមមានចរន្តនៃការបែមករកសារព័ត៌មានអាជីពវិញ បន្ទាប់ពីការប្រើប្រាស់បណ្តាញសង្គមកន្លងមក មិនអាចយកជាការបានក្រៅពីការមើល ឬអានដើម្បីកំសាន្ត ដើម្បីជាដំណឹង និងជាព័ត៌មានបឋមដែលពុំគ្រប់ជ្រុងជ្រោយ ពុំមានប្រភពច្បាស់លាស់។

លោក ពុយ គា បន្តថា ដោយឡែក មានតែអ្នកសារព័ត៌មានទេដែលអាចទទួលបាន ឬអាចកាន់កាតអ្នកកាសែតបាន រីឯបុគ្គលិកអ្នកធ្វើការនៅក្នុងវិស័យព័ត៌មាន មិនអាចកាន់កាតអ្នកកាសែតបានឡើយ។ ហេតុដូច្នេះហើយ បានជាសមាជិករបស់សមាគមអ្នកកាសែតវៀតណាមដែលមានចំនួន 41,000 (បួនម៉ឺនមួយពាន់នាក់) មានតែ 20,500 (ពីរម៉ឺនប្រាំរយនាក់) ប៉ុណ្ណោះដែលកាន់កាតអ្នកកាសែត។

លោក ពុយ គា បានបញ្ជាក់ថា ​នៅវៀតណាម មានស្ថាប័នព័ត៌មានធំចំនួន6ដែលចំណុះបក្សនិងរដ្ឋ ហើយដែលគេយកជាផ្លូវការនៅរាល់ការផ្សាយព័ត៌មានទាំងអស់រួមមាន ៖ កាសែតប្រជាជន (Nhan Dan), ទីភ្នាក់ងារព័ត៌មានវៀតណាម (VNA), ទូរទស្សន៍វៀតណាម (VTV), វិទ្យសម្លេងវៀតណាម (VoV), កាសែតកងទ័ពប្រជាជន, កាសែតនគរបាល៕