នៅថ្ងៃបោះឆ្នោត អាមេរិកដាក់ពង្រាយទាហានឆ្មាំជាតិរាប់ពាន់នាក់ដើម្បីទប់ទល់នឹងភាពវឹកវរ
សារព័ត៌មាន Cambodia News/
អាមេរិក (០៤ វិច្ចិកា ២០២០) ៖ យោងតាមប្រភពពីសារព័ត៌មានស៊ិនហួរ បានឲ្យដឹងថា ទាហានឆ្មាំជាតិសហរដ្ឋអាមេរិកជាង៤.៧០០នាក់នៅក្នុងរដ្ឋចំនួន១៨ ត្រូវបានដាក់ពង្រាយដើម្បីជួយក្នុងការបោះឆ្នោតដែលកំពុងបន្ត។
កាសែតយោធា Military Times បាននិយាយថា “បេសកកម្មរបស់ពួកគេមានដូចជាជួយការពារប្រព័ន្ធអ៊ីនធើណិតជួយដល់ការបោះឆ្នោតនិងប្រុងជើងការក្នុងករណីមានភាពវឹកវរស៊ីវិលក្រោយការបោះឆ្នោត” ។
ក្នុងចំណោមរដ្ឋទាំងអស់ Texas, Pennsylvania និង Massachusetts បានដាក់ពង្រាយឆ្មាំជាតិចំនួន១,០០០នាក់ដើម្បីប្រុងប្រៀបទប់ទល់នឹងភាពចលាចលស៊ីវិល និងអំពើហិង្សា ខណៈរដ្ឋ Arizona និង Alabama មានកងទ័ពចំនួន៣០០នាក់ក្នុងមួយរដ្ឋៗ។
ជនជាតិអាមេរិកាំងកំពុងធ្វើដំណើរទៅកាន់ស្ថានីយបោះឆ្នោតនៅទូទាំងប្រទេសនៅថ្ងៃអង្គារ សម្រាប់ការបោះឆ្នោតឆ្នាំ២០២០។ មនុស្សជាច្រើនមានការព្រួយបារម្ភអំពីតថភាពនៃប្រជាជាតិដែលបែកបាក់គ្នាកាន់តែខ្លាំងឡើងដូចជាជម្លោះជាតិសាសន៍និងអំពើអយុត្ដិធម៌សង្គមដែលកាន់តែអាក្រក់ទៅៗ។
នៅរដូវក្តៅកន្លងទៅនេះកងកំលាំងឆ្មាំជាតិត្រូវបានដាក់ពង្រាយនៅក្នុងរដ្ឋមួយចំនួននៅទូទាំងប្រទេសដើម្បីឆ្លើយតបនឹងភាពវឹកវរស៊ីវិលបន្ទាប់ពីមរណភាពរបស់លោក George Floyd ដែលជាជនជាតិអាមេរិកដើមកំណើតអាហ្វ្រិកដែលត្រូវបានសម្លាប់ដោយប៉ូលិស៕
