អ្នកគាំទ្រភ្ញាក់ផ្អើលក្រោយឃើញលោក Trump ជិះក្នុងរថយន្តនៅខាងក្រៅពីមន្ទីរពេទ្យ
សារព័ត៌មាន Cambodia News/
អាមេរិក ៖ ប្រធានាធិបតីអាមេរិកលោក Donald Trump បានធ្វើឲ្យអ្នកគាំទ្រដែលប្រមូលផ្តុំគ្នានៅខាងក្រៅមន្ទីរពេទ្យដែលគាត់កំពុងព្យាបាលជំងឺកូវីដមានការភ្ញាក់ផ្អើលយ៉ាងខ្លាំងដោយគាត់បានជិះក្នុងរថយន្តបើកឆ្លងកាត់ពួកគេ។ នេះបើយោងតាមប្រភពពីសារព័ត៌មាន BBC។
ដោយមានពាក់ម៉ាសលោកប្រធានាធិបតីអាមេរិក បានគ្រវីដៃនៅខាងក្នុងរថយន្ត បន្ទាប់ពីលោកនិយាយក្នុង Twitter ថាលោកនឹងធ្វើដំណើរទស្សនកិច្ចគួរឱ្យភ្ញាក់ផ្អើលមួយ។ លោក Trump ដែលត្រូវបានគេរិះគន់ចំពោះការគ្រប់គ្រងរបស់គាត់លើជំងឺរាតត្បាតកូវីដ១៩ក៏បាននិយាយផងដែរថា គាត់បានដឹងច្រើនអំពីវីរុសនេះកូរ៉ូណា។
ស្ថានភាពរបស់លោកប្រធានាធិបតីកំពុងមានភាពប្រសើរឡើង ខណៈពេលដែលគាត់កំពុងទទួលការព្យាបាលជំងឺកូវីដ១៩នៅឯមន្ទីរពេទ្យយោធា ហើយគាត់អាចត្រឡប់ទៅសេតវិមានវិញបាននៅថ្ងៃចន្ទនេះ។ នេះបើតាមការឲ្យដឹងពីក្រុមវេជ្ជបណ្ឌិតដែលកំពុងដឹកនាំការព្យាបាលគាត់។ ព័ត៌មាននេះកើតឡើងមួយថ្ងៃបន្ទាប់ពីសារផ្ទុយគ្នាជាច្រើនចេញពីសេតវិមានអំពីស្ថានភាពរបស់លោក Trump បានបណ្តាលឲ្យមានការភាន់ច្រលំយ៉ាងខ្លាំងអំពីសុខភាពរបស់គាត់។
លោកវេជ្ជបណ្ឌិត Sean Dooley បានប្រាប់អ្នកសារព័ត៌មាននៅមន្ទីរពេទ្យយោធាជាតិ Walter Reed ដែលជាកន្លែងលោក Trump ទទួលការព្យាបាលចាប់តាំងពីថ្ងៃសុក្រមកថា “អ្នកជំងឺបន្តធូរស្បើយ។ គាត់នៅតែមិនក្តៅខ្លួនតាំងពីព្រឹកថ្ងៃសុក្រមក”។ លោក Trump បានចេញវីដេអូរយៈពេល៤នាទីកាលពីថ្ងៃសៅរ៍ដែលក្នុងនោះគាត់បាននិយាយថា ការធ្វើតេស្តពិតប្រាកដអំពីស្ថានភាពរបស់គាត់នឹងកើតមានក្នុងរយៈពេលពីរបីថ្ងៃខាងមុខ៕
