សម្តេចតេជោ ៖ ការលាបព័ណ៌គ្នា ការជេរប្រមាថគ្នា មិនមែនជាគុណធម៌ សុជីវធម៌ សម្រាប់យុវជន
សារព័ត៌មាន Cambodia News/
ភ្នំពេញ (០១ សីហា ២០១៦) ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវទៅកាន់យុវជនទាំងអស់ ពុំគួរប្រើប្រាស់វិធីជេរប្រមាថ, វិធីលាបព័ណ៌គ្នា និងវិធីបោកបញ្ឆោត នោះទេ ហើយសម្តេចមានប្រសាសន៍ថា បើសិនជាយើងចេះប្រើចំណេះរបស់យើង គឺអាចនឹងមានការជឿនលឿន។
សម្តេចតេជោ ហ៊ុន សែន បានមានប្រសាសន៍យ៉ាងដូច្នេះ ខណៈអញ្ជើញជាអធិបតីក្នុងពិធីអបអរសាទរ និងប្រគល់រង្វាន់ ដល់ជ័យលាភី នៃកម្មវិធីខ្ញុំជាយុវជនគំរូកម្ពុជា វគ្គពិសេសប្រចាំឆមាស ជំនាន់ទី៦ ដែលប្រព្រឹត្តិទៅនៅវិមានសន្តិភាព ទីស្តីការនាយករដ្ឋមន្ត្រី នាព្រឹកថ្ងៃទី៣១កក្កដានេះ។
សម្តេចតេជោ បានបញ្ជាក់ថា តាមរយៈហ្វេសប៊ុកផ្លូវការរបស់សម្តេច ចំណុចដែលសម្តេចដោះស្រាយបាន គឺមានតែផ្តល់ការពិតតែប៉ុណ្ណោះ ទើបសម្តេចអាចដោះស្រាយជូនបាន ។ បើមិនអាចផ្តល់ការពិតជូនសម្តេចបានទេ គឺមិនអាចដោះស្រាយចំបញ្ហាឡើយ ពិតមែនតែបញ្ហាខ្លះដោះស្រាយមិនចំ បញ្ហា ប៉ុន្តែ ក៏ត្រូវបាននិរាករណ៍វិញផងដែរ។
សម្តេចតេជោ ហ៊ុន សែន បានមានប្រសាសន៍ផងដែរថា យុវជនដែលកើតឡើងនៅពេលនេះ ពិតជាមានសំណាងខ្លាំងណាស់។ ក្នុងន័យនេះ សម្តេចបញ្ជាក់ថា បើក្មួយៗមិនចេះប្រើឱកាសនោះទេ មិនដឹងថាតើនឹងមានឱកាសណាលើសពីហ្នឹងទៀតឡើយ!។ ក្នុងបញ្ហានេះ សម្តេចបានបង្ហាញអំពីប្រវត្តិដ៏ជូរចត់របស់សម្តេច ពីអតីតកាលក៏ដូចជាយុវជនជំនាន់មុននិងប្រជាជនដទៃទៀត ដែលបាត់បង់ឱកាសដោយសារសង្គ្រាមដែលជាកំហុសរបស់អ្នកនយោបាយ។
ក្នុងបញ្ហានេះ សម្តេចក៏ផ្តាំផ្ញើដល់យុវជនទាំងអស់ កុំសំឡឹងលើ គឺសំឡឹងក្រោម ដើម្បីកុំឱ្យមានកំហឹងវណ្ណៈ យ៉ាងណាមិញដូចជា ប៉ុលពតដោយសារតែការប្រៀបធៀប ទើបនាំឱ្យមានការបង្កើតជាកំហឹងវណ្ណៈ ដែលនាំទៅមានការកាប់សម្លាប់។ ដូច្នេះ សម្តេចបានផ្តាំផ្ញើឱ្យយុវជន ត្រូវប្រើប្រាស់ឱកាសមាស ឱកាសពេជ្រ ដែលកម្ពុជាមានសព្វថ្ងៃនេះ បើមិនដើម្បីជាតិទាំងមូលទេ អ្វីដែលត្រូវខិតខំ គឺប្រយោជន៍ផ្ទាល់ខ្លួនតែម្តង៕
