មន្ត្រីយោធាម្នាក់រួមរ័កជាមួយសង្សារ ថតវីដេអូ គំរាមទារប្រាក់ ៨ ម៉ឺនដុល្លារ ត្រូវសមត្ថកិច្ចចាប់ខ្លួន
សារព័ត៌មាន Cambodia News/
ភ្នំពេញ (១៨ មីនា ២០១៥) ៖ កាលពីព្រឹកថ្ងៃទី១៧ ខែមីនា មន្ត្រីយោធាម្នាក់ ត្រូវបានកម្លាំងកងរាជអាវុធហត្ថ ចាប់ខ្លួនបាន ស្ថិតនៅ តាមបណ្តោយផ្លូវកែវចិន្តា ក្នុងសង្កាត់ជ្រោយចង្វា ខណ្ឌជ្រោយចង្វា ខណៈដែលគេធ្វើដំណើរទៅយកលុយចំនួន ៨ ម៉ឺនដុល្លារ ពីក្រុមគ្រួសារស្ត្រីជាសង្សាររបស់ខ្លួន ជាថ្នូរទៅនឹងការមិនបញ្ចេញខ្សែវីដេអូ ដែលថតពីសកម្មភាពពួកគេរួមរ័កគ្នា។
ជនសង្ស័យដែលកម្លាំងកងរាជអាវុធហត្ថលើផ្ទៃប្រទេស សហការជាមួយកងរាជអាវុធហត្ថខណ្ឌជ្រោយចង្វា ធ្វើកាឃាត់ខ្លួន ត្រូវបានគេស្គាល់ឈ្មោះ លឹម សីហា ហៅ ថត សីហា មានមុខងារជាយោធានៅអង្គភាពឆ័ត្រយោង ៩១១។
ចំណែកភាគីខាងស្ត្រីរងគ្រោះ មិនត្រូវបានគេបង្ហាញអត្តសញ្ញាណ នោះឡើយ ដោយគ្រាន់តែដឹងថា ជាកូនអ្នកមាន ហើយមានទីលំនៅក្នុងសង្កាត់ជ្រោយចង្វា ក្បែរកន្លែងសមត្ថកិច្ចឃាត់ខ្លួន។ ក្រោយពីឃាត់ខ្លួនសមត្ថកិច្ចអាវុធហត្ថ មិនបានផ្តល់ព័ត៌មានអ្វីដល់អ្នកសារព័ត៌មានឡើយ។
តាមប្រភពព័ត៌មានបានឲ្យដឹងថា កន្លងមករវាងជនសង្ស័យ និងស្ត្រីកូនអ្នកមានខាងលើនេះ បានស្រឡាញ់គ្នា ហើយពេលរួមរ័កគ្នា ជនសង្ស័យបានលួចថតវីដេអូទុក។ លុះក្រោយមកស្រាប់តែជនសង្ស័យ បានយកវីដេអូខាងលើ ទៅឲ្យសង្សាររបស់ខ្លួនមើល រួចហើយធ្វើការគំរាមទារប្រាក់ចំនួន ៨ម៉ឺនដុល្លារ ជាថ្នូរ ទៅនឹងការមិនបញ្ចេញខ្សែវីដេអូខាងលើនេះ ជាសាធារណៈ៕
