ពលរដ្ឋអាមេរិក ប្រឆាំងនឹងអូបាម៉ា ប្រកាសធ្វើសង្គ្រាមប្រឆាំងក្រុមភេវរករ
សារព័ត៌មាន Cambodia News/
វ៉ាស៊ីនតោន (១១ គញ្ញា ២០១៤) ៖ ពលរដ្ឋអាមេរិកមួយចំនួន ដែលស្រលាញ់សន្តិភាព បាននាំគ្នាតវ៉ាប្រឆាំងដោយលើកបដានានា នៅក្រៅរបងសេតវិមាន គ្រាដែលលោកប្រធានាធិបតីបារ៉ាក់ អូបាម៉ា ប្រកាសពីការប្រើកម្លាំងវាយប្រហារ តាមអាកាសប្រឆាំងនឹងពួកឧទ្ទាមរដ្ឋអ៊ីស្លាម នៅក្នុងប្រទេសស៊ីរី និងអ៊ីរ៉ាក់។
នៅថ្ងៃព្រហស្បតិ៍ ទី១១ ខែកញ្ញា ឆ្នាំ២០១៤ ប្រជាពលរដ្ឋទាំងនោះ បានលើកបដា ដោយមានរូបត្លុកលោកប្រធានាធិបតី អូបាម៉ា ជាមួយនឹងសរសេរថា “អត់មានការប្រើប្រាស់កម្លាំងយោធាអីទេ”។ រីឯបដាមួយទៀតសរសេរថា “អត់មានសង្គ្រាមអាមេរិក នៅក្នុងប្រទេសអ៊ីរ៉ាក់ តទៅទៀតទេ”។
លោកប្រធានាធិបតី បានផ្ញើសារមួយពីសេតវិមាន ដោយការផ្សាយផ្ទាល់តាមកញ្ចក់ទូរទស្សន៍ ដោយបានអះអាងថា លោក បើកយុទ្ធនាការវាយប្រហារ តាមដែនអាកាសប្រឆាំងពួកឧទ្ទាមរដ្ឋអ៊ីស្លាម (ISIS) បន្ទាប់ពីក្រុមនេះ បានកាត់ក្បាលអ្នកកាសែតអាមេរិកាំងពីរនាក់ ក្នុងរយៈពេល ២សប្តាហ៍។ គួរបញ្ជាក់ផងដែរ ថ្ងៃទី១១ ខែកញ្ញា ឆ្នាំ២០១៤ ជាខួបឆ្នាំទី ១៣ នៃព្រឹត្តិការណ៍វាយប្រហាររបស់ ក្រុមភេវរករអាល់កៃដា ១១/០៩/២០០១ នៅបុរីញូវយ៉ក៕
