CNRP រង់ចាំការកំណត់ថ្ងៃជួបចចារជាថ្មីជាមួយ CPP
សារព័ត៌មាន Cambodia News/
ភ្នំពេញ(១៥ កុម្ភៈ ២០១៤)៖ កាលពីនៅថ្ងៃទី១៤ ខែកុម្ភៈ គណបក្សសង្គ្រោះជាតិ បានក្នុងសេចក្តីថ្លែងការណ៍របស់ខ្លួនថា ខ្លួនរង់ចាំការកំណត់ថ្ងៃជំនួបជាថ្មី ជាមួយគណបក្សប្រជាជនកម្ពុជា ដើម្បីជជែកពីកំណែទម្រង់ការបោះឆ្នោត និងឈានទៅរកការបោះឆ្នោតមុនអាណ្ណត្តិ។
-
គណបក្សសង្គ្រោះជាតិ និងគណបក្សប្រជាជនកម្ពុជា ក្នុងថ្ងៃជំនួបចចារកន្លងមក។ ការប្រកាសនេះ ធ្វើឡើងមួយថ្ងៃបន្ទាប់ពីគណបក្សប្រជាជនកម្ពុជា កាលពីថ្ងៃព្រហស្បតិ៍ បានស្នើសុំគណបក្សសង្គ្រោះជាតិឲ្យចាត់តំណាងរបស់ខ្លួន ជួបចរចាជាមួយតំណាងគណបក្សប្រជាជនកម្ពុជា ដើម្បីរៀបចំយន្តការមួយសម្រាប់កិច្ចដំណើរការកែទម្រង់ការបោះឆ្នោត នាពេលខាងមុខ។
សេចក្តីថ្លែងការណ៍គណប្រឆាំង ឲ្យដឹងថា គណបក្សប្រឆាំងចង់ដោះស្រាយការជាប់គាំងបច្ចុប្បន្ន គឺគោរពតាមឆន្ទៈ ប្រជាពលរដ្ឋជាម្ចាស់ឆ្នោត ដែលទាមទារឲ្យបង្កើតគណៈកម្មការស៊ើបអង្កេតភាពមិនប្រក្រតីនៃ ការបោះឆ្នោតឆ្នាំ២០១៣ឬបោះឆ្នោតវិញមុនអាណ្ណត្តិ។
សេចក្តីថ្លែងការណ៍ បន្តថា គណបក្សសង្គ្រោះជាតិ មានបំណងចង់ដោះស្រាយដោយសន្តិវធី អហិង្សា តាមរយៈការជជែក ពិភាក្សា រកដំណោះស្រាយ ដូច្នេះគណបក្សរង់ចាំការកំណត់ថ្ងៃជួបជាមួយគណបក្សប្រជាជនកម្ពុជា ដើម្បីចាត់តាំងតំណាងរបស់ខ្លួនចូលរួមជជែក រៀបចំយន្តការកំណែទម្រង់ការបោះឆ្នោត នាពេលខាងមុខ ដើម្បីឲ្យមានការផ្លាស់ប្តូរសមាសភាពគជប និងកំណត់ថ្ងៃនៃការបោះឆ្នោតឡើងវិញមុនអាណ្ណត្តិ។
ចំ ណែកសេចក្តីថ្លែងការណ៍ របស់គណបក្សប្រជាជនកម្ពុជា ចុះថ្ងៃទី១៣ ខែកុម្ភៈ នេះឲ្យដឹងថា កំណែទម្រង់ការបោះឆ្នោត ជាកិច្ចដំណើរការដែលធ្លាប់បានអនុត្តជាបន្តបន្ទាប់កន្លងទៅ និងជាកំណែទម្រង់ដ៏ស្មុគស្មាញ ដែលទាមទារពេលវេលា ដោយមិនអាចអូសបន្លាយពេលវេលាតទៅទៀតបានឡើយ។
គណបក្សប្រជាជន កម្ពុជា បញ្ជាក់ទៀតថា កន្លងទៅគណបក្សសង្គ្រោះជាតិ តែងតែផ្លាស់ប្តូរប្រធានបទ និងលក្ខខណ្ឌនែការទាមទារជាបន្តបន្ទាប់ ជាហេតុធ្វើឲ្យការពិភាក្សាអំពីកិច្ចដំណើរការកំណែទម្រង់ការបោះឆ្នោត ត្រូវបានអូសបន្លាយរហូតមកទល់បច្ចុប្បន្ននេះ៕