លោកមរស៊ីនឹងដាក់ពាក្យប្តឹងតុលាការប្រឆាំងបណ្តាជនដែលធ្វើរដ្ឋប្រហារទំលាក់រូបលោក
អតីតប្រធានាធិបតីអេហ្ស៊ីប មហាមេដ មរស៊ី នឹងធ្វើបណ្តឹងទៅតុលាការដើម្បីប្រឆាំងបណ្តាជនដែលបាន ធ្វើរដ្ឋប្រហារទំលាក់រូបលោកចេញពីតំណែងប្រធានាធិបតី។ នេះបើយោងតាមការប្រាប់អោយដឹងពីមេធាវីរបស់លោកមរស៊ី នៅថ្ងៃពុធនេះ។ ដោយឡែក នៅថ្ងៃពុធនេះដែរ តុលាការបានសំរេចអោយអេហ្ស៊ីបបិទបញ្ចប់ស្ថានភាពប្រកាសអាសន្ន ដែលកងទ័ពបានដាក់ចេញ តាំងពីពាក់កណ្តាលខែសីហាមក។
អតីតប្រធានាធិបតីអេហ្ស៊ីប មហាមេដ មរស៊ី នឹងធ្វើបណ្តឹងពីបទឧក្រិដ្ឋទៅតុលាការ ដើម្បីប្រឆាំងរាល់បណ្តាជនដែលបានធ្វើរដ្ឋប្រហារទំលាក់ រូបលោកចេញពីតំណែងប្រធានាធិបតី កាលពីដើមខែកក្កដា កន្លងទៅ។ នេះបើយោងតាមមេធាវីរបស់លោកមរស៊ី នៅថ្ងៃពុធនេះ។
សំរាប់លោកមរស៊ី រដ្ឋប្រហារកន្លងមកនោះ គឺជាបទឧក្រិដ្ឋសុទ្ធសាធ។ នៅអេហ្ស៊ីប លោកមរស៊ីកំពុងជាប់ឃុំពីបទញុះញង់អោយមានការសម្លាប់មនុស្ស ទាក់ទងបាតុកម្ម ខែធ្នូឆ្នាំ២០១២ នៅមុខវិមានប្រធានាធិបតីអេហ្ស៊ីប។ កាលណោះ មានមនុស្សជាង១០នាក់បានស្លាប់ ដោយការប៉ះទង្គិចគ្នារវាងសកម្មជនបក្សភាតរអ៊ីស្លាមរបស់លោក និងបាតុករដែលទាមទារអោយលោកចុះពីអំណាច។ តុលាការអេហ្ស៊ីបនឹងបើកសវនាការកាត់ទោសលោក នៅថ្ងៃ៨មករាឆ្នាំ២០១៤ខាងមុខ។
គួររំលឹកថា នៅដើមកក្កដា កន្លងទៅ ប្រមុខទ័ពអេហ្ស៊ីបលោក អាល់ស៊ីសស៊ី គឺជាអ្នកដែលបានប្រកាសពីការទំលាក់លោកមរស៊ីពីអំណាច និងការឃុំរូបលោកមរស៊ី។ ប្រមុខទ័ពអេហ្ស៊ីបក៏បានចាត់តាំងរដ្ឋាភិបាលស្តីទីមួយ អោយសើរើរដ្ឋធម្មនុញ្ញឡើងវិញ ដើម្បីរៀបចំការបោះឆ្នោតសភា និងប្រធានាធិបតី នៅឆ្នាំ២០១៤ ខាងមុខដែរ។
ដោយឡែក នៅថ្ងៃពុធនេះដែរ តុលាការអេហ្ស៊ីបបានចេញបញ្ជាអោយរដ្ឋាភិបាលបិទបញ្ចប់ស្ថានភាព ប្រកាសអាសន្នក្នុងប្រទេស នៅថ្ងៃព្រហស្បត្តិ៍នេះ។ ស្ថានភាពអាសន្ននេះត្រូវបានកងទ័ពបានដាក់ចេញ តាំងពីពាក់កណ្តាលខែសីហាមក។ រដ្ឋាភិបាលអេហ្ស៊ីបបានប្រាប់ថា ខ្លួនគោរពការសំរេចរបស់តុលាការ ប៉ុន្តែរង់ចាំអោយមានញត្តិផ្លូវការសិន មុននឹងអនុវត្តសេចក្តីសំរេចនេះ។
គួររំលឹកថា កាលពីថ្ងៃ១៤សីហា ប្រធានាធិបតីស្តីទី លោក អាល់ឌី ម៉ាន់ស៊ួ បានប្រកាសដាក់អេហ្ស៊ីបក្នុងស្ថានភាពអាសន្ន ព្រមទាំងដាក់បំរាមគោចរមិនអោយប្រជាជនចេញដើរពេលយប់ផងដែរ។ ថ្ងៃ១៤សីហា ឆ្នាំ២០១៣ ក៏ជាថ្ងៃដែលកងទ័ពអេហ្ស៊ីបបានបង្ក្រាបបាតុកម្មរបស់សកម្មជនគាំទ្រ លោកមរស៊ី ធ្វើអោយមានមនុស្សស្លាប់រាប់រយនាក់ផងដែរ។
ការប្រកាសដាក់អេហ្ស៊ីបអោយស្ថិតក្នុងស្ថានភាពអាសន្ន ជាការផ្តល់អំណាចទូលំទូលាយដល់សេវាការពារសន្តិសុខជាតិ ប៉ុន្តែ យោងតាមក្រិត្យច្បាប់មួយរបស់អេហ្ស៊ីប រដ្ឋាភិបាលអាចប្រកាសស្ថានភាពអាសន្ននេះជាថ្មីបាន លុះត្រាតែឆ្លងកាត់ការបោះឆ្នោតប្រជាមតិជាមុនសិន៕ដោយ ព្រំ សឿន សូលីណា (RFI)