លោក សម រង្ស៊ី នឹងមកដល់កម្ពុជានៅថ្ងៃសុក្រ ម៉ោង៩ព្រឹក
ភ្នំពេញ៖ តាមព័ត៌មានចុងក្រោយនៃការវិលត្រឡប់របស់ប្រធានគណបក្សប្រឆាំង លោក សម រង្ស៊ី ត្រូវបានអះអាងជាថ្មីថាលោក នឹងមកដល់កម្ពុជានៅព្រឹកថ្ងៃសុក្រ ទី១៦ សីហាស្អែក។ នេះបើតាមប្រភពរបស់គណបក្សប្រឆាំង។
គួររំលឹកថា ប្រធានគណកប្សប្រឆាំងរូបនេះ បានអវត្តមានពីកម្ពុជាតាំងពីថ្ងៃទី៦ សីហាមកម្លេះ។ លោក សម រង្ស៊ី បានអវត្តមានពីប្រទេសរយៈពេលជាងមួយសប្តាហ៍ដើម្បីទៅចូលរួមពិធីការ របស់កូនស្រីនៅសហរដ្ឋអាមេរិក។
នៅសហរដ្ឋអាមេរិកនោះហើយ ដែលលោក សម រង្ស៊ីកាលពីថ្ងៃទី១១ សីហា បានព្រមានពីការធ្វើមហាបាតុកម្មប្រសិនបើក្រុមចម្រុះបច្ចេកទេស ដើម្បីអង្កេតលើភាពមិនប្រក្រតីនៃការបោះឆ្នោត នៅតែ មានភាពចម្រូងចម្រាសមិនអាចស្វែងរកយុត្តិធម៌ជូនប្រជាពលរដ្ឋបាន។
ទាក់ទិននឹងការប្រកាសធ្វើបាតុកម្មនេះដែរ លោកស្រី មួរ សុខហួរ បានបញ្ជាក់ថា គោលជំហររបស់គណបក្សសង្គ្រោះជាតិ គឺផ្តល់យុត្តិធម៌ដល់អ្នកបោះឆ្នោត។ មន្ត្រីគណបក្សប្រឆាំងរូបនេះបានអះអាងថា បានរកឃើញភាពមិនប្រក្រតីប្រមាណជាង១ម៉ឺនករណីទាក់ទងនឹងការបាត់ឈ្មោះ អ្នកបោះឆ្នោត ដែលធ្វើឲ្យពួកគេមិនអាចបោះឆ្នោតជ្រើសរើសតំណាងរាស្ត្របាន។
យ៉ាងណាក៏ដោយ គណបក្សសង្គ្រោះជាតិ បានបញ្ជាក់ថា មហាបាតុកម្មដែលនឹងអាចផ្ទុះឡើងនោះ គឺជាមហាបាតុកម្មអហិង្សា៕ នាង/Cambodia News