ប៉ូលិសត្រៀមអាសន្នក្រោយអំពើហិង្សាពុទ្ធសាសនាប្រឆាំងអ៊ីស្លាម
បម្រាម គោរចរណ៍បានលើកចេញវិញហើយនៅ ព្រឹកថ្ងៃអាទិត្យទី ១១សីហា នេះ ប៉ុន្តែវត្តមានរបស់កងកម្លាំងប៉ូលិស នៅតែមានច្រើនសន្ធឹកសន្ធាប់ដដែល ក្នុងក្រុងកូឡុំបូ បន្ទាប់ពីក្រុមអ្នកកាន់ព្រះពុទ្ធសាសនាបានបើកការវាយប្រហារទៅលើ វិហារអ៊ីស្លាមយប់មិញ។
ប៉ូលិសប្រឆាំងភេរវកម្មរាប់រយនាក់ ត្រូវបានដាក់ពង្រាយនៅជុំវិញតំបន់ ដែលជាប្រភពនៃការផ្ទុះអំពើហិង្សា អន្តរសាសនា នាទីក្រុងកូឡុំបូ ម្សិលមិញ រហូតបង្កឱ្យមានមនុស្សរងរបួសយ៉ាងហោចណាស់ បួននាក់។
ចំណែករដ្ឋាភិបាលវិញ មិនបានធ្វើអត្ថាធិប្បាយអ្វីទាក់ទងនឹងហេតុការណ៍ហិង្សានេះ ដែលក្រុមអ្នកព្រះពុទ្ធសាសនា នាំគ្នាស្ទុះទៅវាយប្រហារ ចោលដុំថ្ម លើវិហារអ៊ីស្លាម នាឱកាសបើកសម្ពោធថ្មី។ ការស្ពប់ខ្ពើមរើសអើងសាសានាអ៊ីស្លាម តែងរុញច្រានឱ្យមានអំពើហិង្សាជារឿយៗ។ កាលពីខែមីនាកន្លងទៅ ហាងទំនិញពីរមានម្ចាស់ជាជនជាតិអ៊ីស្លាម ត្រូវបានដុតបំផ្លាញ។ ប៉ូលិសបានឃាត់ខ្លួនសង្ឃបីអង្គ និងអ្នកកាន់ពុទ្ធសាសនា១៤រូប ប៉ុន្តែត្រូវដោះលែងទៅវិញ ដោយគ្មាននរណាដាក់ពាក្យបណ្តឹងប្រឆាំងក្នុងសំណុំរឿងនេះ។
សូមបញ្ជាក់ថា ក្នុងចំណោមបណ្តាជនស្រីលង្កា ជាង២០លាននាក់ ជាង៧០%ជាអ្នកកាន់ព្រះពុទ្ធសាសនា ១៣%កាន់សាសនាហិណ្ឌូ និង អ៊ីស្លាមប្រមាណជិត១០% សល់ពីនោះ គឺជាគ្រិស្តសាសនិកជន។ គណបក្សអ៊ីស្លាម ដ៏សំខាន់បំផុតមួយរបស់ប្រទេស ក៏មានចំណែកក្នុង រដ្ឋាភិបាលចម្រុះរបស់លោកប្រធានាធិបតីស្រីលង្កា មហ៊ីនដា រ៉ាចាប៉ាក់សេ ដែរ ប៉ុន្តែ សហគមអ៊ីស្លាមមិនសូវមានសំឡេងមានអំណាចអ្វីទេ ក្រុមពុទ្ធសាសនាជ្រុលនិយម ក្នុងជួររដ្ឋាភិបាល បានដាក់គំនាបនិងសម្ពាធមានកាន់តែខ្លាំង រហូតរុញច្រានឱ្យប្រមុខសាសនាអ៊ីស្លាមដកសំណើសុំសិទ្ធិ វាយត្រា Halalលើចំណីអាហារ ចេញវិញ។ បណ្តាជនអ្នកកាន់ព្រះពុទ្ធសាសនាតែង តែងប្រឆាំង យ៉ាងសន្ធោសន្ធៅ មិនមានវិហារអ៊ីស្លាម នៅជិត ទោះបីជារដ្ឋាភិបាល និងអាជ្ញាធរយល់ព្រមនិងធានាក៏ដោយ៕ដោយ អៀង សុខម៉ិញ(RFI)
