មន្ត្រីជាន់ខ្ពស់គណបក្សកុំម្មុយនិស្តចិនមួយរូប ត្រូវបណ្តេញចេញពីជួរបក្ស
យោងតាមសារព័ត៌មានផ្លូវការចិនថ្មី នៅថ្ងៃព្រហស្បតិ៍នេះ គណបក្សកុំម្មុយនិស្តចិន បានបណ្តេញមន្ត្រីជាន់ខ្ពស់មួយរូប គឺលោក Liu Tienan ដែលមានឋានៈស្មើអនុរដ្ឋមន្ត្រីអោយចេញពីជួរគណបក្ស។ លោក Liu គឺជាអតីតនាយករងនៅទីភ្នាក់ងារផែនការ ដែលជាទីភ្នាក់ងារដ៏មានឥទ្ធិពលនៅចិន។ លោក Liu បានធ្វើខុសពីសីលធម៌ ដោយសារបំពានអំណាចបុណ្យសក្តិ ស៊ីសំណូកសូកប៉ាន់ រកប្រយោជន៍អោយក្រុមគ្រួសារខ្លួន។
នៅថ្ងៃព្រហស្បតិ៍នេះ កាសែតចិនថ្មីបានលើកឡើងថា យោងតាមគណៈកម្មការវិន័យគណបក្សកុំម្មុយ និស្តចិន លោក Liu Tienan និងក្រុមគ្រួសារបានទទួលប្រាក់សំណូកច្រើនលើសលប់។ ការបណ្តេញលោក Liu Tienan ចេញពីជួរគណបក្សកុំម្មុយនិស្តចិននេះ ធ្វើឡើង បន្ទាប់ពីពេលដែលលោក Liu ត្រូវបានដកហូតពីតំណែងដឹកនាំជាន់ខ្ពស់នានា។
លោក Liu ធ្លាប់កាន់ការងារនៅគណៈកម្មការជាតិដើម្បីកំណែទំរង់ និងការអភិវឌ្ឍន៍ ដែលទទួលបន្ទុកគំរោងឧស្សាហកម្មធំៗនៅចិន។ ហើយរហូតដល់ខែមិនា កន្លងទៅ លោកក៏ជាមេដឹកនាំមួយរូបនៃទីភ្នាក់ងារថាមពលជាតិចិនផងដែរ។ កាលពីខែឧសភា មន្ទីររៀបរៀងនៃគណបក្សកុំម្មុយនិស្តចិន បានដកហូតតំណែងដឹកនាំទាំងអស់នេះពី Liu Tienan។
នៅចុងឆ្នាំ២០១២ Luo Changping ជាអគ្គនាយករងទស្សនាវដ្តីសេដ្ឋកិច្ច Caijing ដ៏មានឥទ្ធិពលនៅចិន បានចោទលោក Liu Tienan នៅលើគេហទំព័រអ៊ីនថឺនេតខ្លួនថា លោក Liu បានកេងប្រយោជន៍បុណ្យសក្តិ បំរើផលប្រយោជន៍ក្រុមគ្រួសារ។ នាយករងទស្សនាវដ្តី Caijing បានទទួលព័ត៌មានទាក់ទងបញ្ហានេះ តាមរយៈស្រីកំណាន់ចិត្តលោក Liu ដែលបានទូរសព្ទទាក់ទងពីប្រទេសជប៉ុនមក។ អគ្គនាយករងទស្សនាវដ្តីនេះចំណាយពេលមួយឆ្នាំ ដើម្បីផ្ទៀងផ្ទាត់ មុននឹងចោទប្រកាន់មន្ត្រីជាន់ខ្ពស់គណបក្សកុំម្មុយ និស្តចិន។
យោងតាមអ្នកសង្កេតការណ៍នានា Liu Tienan គឺជាមន្ត្រីដឹកនាំជាន់ខ្ពស់ចិនមួយរូប មានជួរឋានៈស្មើនឹងអនុរដ្ឋមន្ត្រី ដែលបានខ្ទាតចេញពីគណបក្សបន្ទាប់ពីរងការបរិហារតាមអ៊ីនថឺនេត។ ប៉ុន្មានឆ្នាំចុងក្រោយនេះ អ៊ីនថឺនេតបានក្លាយជាសៃវៀននៃការបរិហារអំពើពុករលួយ និងការរំលោភអំណាច នៅប្រទេសចិន។ ប្រធានាធិបតីថ្មី ស៊ី ជីនពីង ដែលឡើងកាន់តំណែង កាលពីខែមិនា បានសន្យាប្រយុទ្ធប្រឆាំងអំពើពុករលួយឥតប្រណីដៃឡើយ មិនថាត្រូវកំចាត់សត្វរុយរឺក៏ប្រហារសត្វខ្លានោះទេ៕ ដោយ ព្រំ សឿន សូលីណា (RFI)
