ស្ត្រីអាមេរិកាំងបីនាក់ត្រូវគេបង្ខាំងទុកអស់១០ឆ្នាំ
ប្រជាជនអាមេរិកមានការស្លុត ចិត្តយ៉ាងខ្លាំង បន្ទាប់ពីទទួលដំណឹងថា ស្ត្រីចំនួនបីនាក់ត្រូវបានជនពាលបីនាក់បង្ខាំងទុកអស់រយៈពេល១០ ឆ្នាំ ហើយត្រូវបានប៉ូលិសជួយសង្គ្រោះអោយរួចពីដៃជនពាលទាំងនោះមក។ រឿងរ៉ាវនេះបានកើតឡើងនៅក្នុងក្រុង Cleveland រដ្ឋOhio ស្ថិតនៅភាគខាងជើងប្រទេស។ ស្ត្រីរងគ្រោះទាំងបីនាក់ត្រូវបានរួចពីដៃជនពាល កាលពីល្ងាចថ្ងៃចន្ទកន្លងមក ដោយសារតែមានអ្នកជិតខាងម្នាក់នៅក្បែរនោះបានជួយអោយពួកនាងបាន ទូរសព្ទទៅប៉ូលិស។
“ខ្ញុំឈ្មោះ Amanda Berry! ខ្ញុំត្រូវគេចាប់ពង្រត់និងបាត់ដំណឹង១០ឆ្នាំហើយ។” នេះជាសំដីលើកឡើងរបស់ស្ត្រីរងគ្រោះ Amanda Berry កាលពីថ្ងៃចន្ទ ដែលបានទូរសព្ទទៅប៉ូលិសដើម្បីអោយអន្តរាគមន៍ស្ត្រីរងគ្រោះពីរ រូបទៀតដែលកំពុងនៅជាប់ឃុំ។
Amanda Berry មានអាយុ២៧ឆ្នាំ ជាប់បង្ខាំងអស់១០ឆ្នាំ Gina DeJesus អាយុ២៣ឆ្នាំ ជាប់បង្ខាំងអស់៩ឆ្នាំ និង Michelle Knight អាយុ៣២ឆ្នាំ ត្រូវជនពាលបង្ខាំងអស់១១ឆ្នាំ។ ស្ត្រីទាំងបីរូបបានជាប់បង្ខាំងខ្លួន ក្នុងផ្ទះជនពាលឈ្មោះ Ariel នៅក្នុងក្រុង Cleveland រដ្ឋOhio ស្ថិតនៅភាគខាងជើងសហរដ្ឋអាមេរិក។ អ្នកជិតខាងម្នាក់នៅក្បែរផ្ទះជនពាល បានជួយអោយ Amanda Berry បានទូរសព្ទទៅប៉ូលិស។ ក្នុងអន្តរាគមន៍សង្គ្រោះស្ត្រីរងគ្រោះទាំងបីរូប ប៉ូលិសក៏បានរកឃើញក្មេងស្រីម្នាក់អាយុ៦ឆ្នាំផងដែរ។ កុមារីនេះត្រូវជាកូនស្រីរបស់ Amanda Berry។ Amanda មានផ្ទៃពោះនិងផ្តល់កំណើតដល់កូនស្រីនាង ក្នុងរយៈពេលដែលនាងត្រូវបានបង្ខាំងទុកនោះ។ ក្រុមប៉ូលិសមិនអាចទប់ ចិត្តនឹងបង្ហូរទឹកភ្នែកបាន នៅពេលដែលបានរកឃើញស្ត្រីរងគ្រោះទាំងនេះ។
ប៉ូលិសបានចាប់ខ្លួនបុរសបីនាក់ដែលជាបងប្អូននឹងគ្នា មានឈ្មោះថា Ariel អាយុ ៥២ឆ្នាំ Onil ៥០ឆ្នាំ និង Pedro Castro ៥៤ឆ្នាំ ក្នុងបទជាប់សង្ស័យថាបានពង្រត់និងឃុំខ្លួនស្ត្រីទាំងបីរូបខាង លើ នៅក្នុងផ្ទះរបស់ Ariel។ ក្នុងរយៈពេល១០ឆ្នាំមកនេះ ស្ត្រីទាំងបីរូបក៏បានរងគ្រោះដោយការរំលោភបំពានរាងកាយផងដែរ។
បន្ទាប់ពីត្រូវបានសង្គ្រោះរួចមក ស្ត្រីទាំងបីរូបបានត្រលប់ចូលទៅរស់នៅក្នុងសង្គម ដូចធម្មតាវិញ។ ស្ត្រីរងគ្រោះនិងកូនស្រីរបស់ Amanda Berry មានសុខភាពល្អធម្មតាទេ។ ពួកនាងនៅត្រៀមចាំឆ្លើយនឹងសំនួររបស់អ្នកស៊ើបអង្កេត។
អ្វីដែលចោទជាសំនួរនៅពេលនេះ គឺថា តើហេតុអ្វីបានជារយៈពេលជាង១០ឆ្នាំមកនេះ ស្ត្រីរងគ្រោះទាំងនេះនៅតែស្ថិតក្នុងការឃុំឃាំង ដោយគ្មានអ្នកណាម្នាក់អាចកត់សម្គាល់ រឺរកឃើញសញ្ញាអ្វីមួយដែលអាចជួយដល់ពួកនាងសោះយ៉ាងនេះ?
ប៉ូលិសអាមេរិកធ្លាប់បានអន្តរាគមន៍ពីរដងរួចមកហើយ នៅផ្ទះរបស់ជនពាលAriel ដែលប្រកបរបរបើកបររថយន្តដឹកសិស្សសាលា។ លើកទីមួយនៅឆ្នាំ២០០០ ទាក់ទងនឹងការវាយតប់គ្នានៅតាមដងផ្លូវ។ ហើយលើកទីពីរនៅឆ្នាំ២០០៤ ទាក់ទងនឹងការដែលជនពាលAriel ភ្លេចក្មេងសិស្ស សាលាម្នាក់នៅក្នុងរថយន្ត។ ប៉ូលិសបានគោះទ្វារផ្ទះជនពាល ប៉ុន្តែជនពាលមិនបានបើកទ្វារ។ ពេលនោះ ប៉ូលិសក៏មិនបានបន្តកិច្ចការអ្វីនៅទីនោះទៀតដែរ ព្រោះគ្មានហេតុផលអ្វីដែលអាចចោទថាជនពាលប្រព្រឹត្តបទល្មើស នោះឡើយ៕ដោយ ព្រំ សឿន សូលីណា (RFI)
