បុរសម្នាក់សន្លប់ស្ដូក ខណៈកំពុងជិះម៉ូតូ ត្រូវរថយន្ត បុកពីក្រោយពេញទំហឹង
Cambodia News
ភ្នំពេញ៖ កាលពីម៉ោង២០និង១០នាទីយប់ ថ្ងៃទី២៨ ខែមីនា បុរសម្នាក់សន្លប់ស្ដូក ខណៈកំពុងជិះម៉ូតូ ត្រូវរថយន្ត បុកពីក្រោយពេញទំហឹង ហើយបើករត់បាត់ ត្រង់ចំណុចមុខវត្តទឹកថ្លា ស្ថិតនៅលើកំណាត់ផ្លូវសហព័ន្ធរុស្សី ក្នុងសង្កាត់ទឹកថ្លា ខណ្ឌសែនសុខ។
មុនពេលកើតហេតុ រថយន្តឡិចស៊ីRX300 បើកបរដោយបុរសម្នាក់ តាមបណ្តោយផ្លូវសហព័ន្ធរុស្សី ក្នុងទិសដៅពីកើតទៅលិច ស្របគ្នាជាមួយនឹងម៉ូតូគុបជ្រុងពណ៌ទឹកប៉ិច ដែលបុរសម្នាក់កំពុងតែជិះ។ លុះដល់ចំណុចកើតហេតុ ម៉ូតូគុបជ្រុងបានបត់ត្រឡប់ក្រោយ ដោយវាងតាមរនាំងដែកត្រង់ចំណុចស្លាកសញ្ញាហាមបត់ ទើបបណ្ដាលឲ្យរថយន្តឡិចស៊ីសបុកពីក្រោយពេញទំហឹង ខ្ទាតទាំងម៉ូតូទាំងម្ចាស់ចំងាយប្រមាណ១០ម៉ែត្រ ហើយបើករត់បាត់។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះបន្ទាន់ ដឹកយកទៅព្យាបាលនៅមន្ទីរពេទ្យព្រះកុសុមៈ ចំណែកម៉ូតូសមត្ថកិច្ចយកទៅរក្សាទុកនៅខណ្ឌសែនសុខ៕ ហេង នាង
