បើករថយន្ត ថយក្រោយជ្រុលទៅបុកម៉ូតូកង់បី នឹងផ្ទះអ្នកធ្វើក្រចក រងរបួសធ្ងន់ស្រាល៣នាក់
ភ្នំពេញ៖ កាលពីវេលាម៉ោង ១១និង១០នាទី ថ្ងៃទី២១ ខែកុម្ភៈ ស្ត្រីម្នាក់ ខណៈពេលកំពុងបើករថយន្តរយ៉ែថយក្រោយ ចេញពីលំនៅឋាន ស្រាប់តែជាប់ចង្កូតទៅបុកម៉ូតូកង់បីដែលនៅពីក្រោយបណ្ដាលឲ្យ ក្រឡាប់ ហើយរថយន្តជ្រុលចូលទៅបុកផ្ទះអ្នកធ្វើក្រចក បណ្ដាលឲ្យរងរបួសធ្ងន់ស្រាលក្នុងផ្ទះ ៣នាក់ នៅចំណុចផ្លូវ១៤៣ កែង២៧៨ ស្ថិតក្នុងសង្កាត់បឹងកេងកងទី២ ខណ្ឌចំការមន។
មុនពេលកើតហេតុ គេសង្កេតឃើញរថយន្តបង្កម៉ាក កូរ៉ូឡា ពណ៌ស្ករ ពាក់ស្លាកលេខភ្នំពេញ2U-6002 បើកបរដោយស្ត្រីម្នាក់ ខណៈពេលបើករថយន្តថយក្រោយចេញពីផ្ទះលេខ 70143 ស្រាប់តែរថយន្តជាប់លេខថយ ក្រោយទៅរហូតទៅប៉ះម៉ូតូកង់បីបណ្ដាលឲ្យ ក្រឡាប់ រួចជ្រុលចូលទៅបុកផ្ទះធ្វើក្រចក បណ្ដាលឲ្យអ្នកធ្វើក្រចកនៅក្នុងផ្ទះនោះម្នាក់រងរបួសធ្ងន់ និង២នាក់ទៀតរងរបួសស្រាល។ ចំណែកម្ចាស់រថយន្តបង្ករត់គេចខ្លួនបាត់។
ក្រោយពេលកើតហេតុជនរងគ្រោះត្រូវសមត្ថកិច្ចហៅរថយន្តសាមុយដឹកយកទៅ សង្គ្រោះនៅមន្ទីរពេទ្យ ចំណែករថយន្តបង្កត្រូវសមត្ថកិច្ចអូសយកទៅរក្សាទុកនៅខណ្ឌចំការមន៕ ហេង នាង
