ចាប់ពីថ្ងៃចន្ទ ១១កុម្ភៈនេះ រុស្ស៊ីឈប់នាំសាច់ពី ស.រ.អា.
បម្រាម ហាមនេះ ប្រកាសដោយរដ្ឋាភិបាលរុស្ស៊ី ស្របនឹងសេចក្តីសន្និដ្ឋាន របស់គ្រូពេទ្យដើមខ្សែខាងអនាម័យទូទាំងសហព័ន្ធរុស្ស៊ី លោក Guennady Onishenko ដែលថា មូលហេតុមកពីនៅតាមកសិដ្ឋានអាមេរិកាំង គេចេះតែបន្តចិញ្ចឹមសត្វ ដោយលាយនឹងចំណីវាទៅដោយថ្នាំម្យ៉ាង ឈ្មោះ Ractopamine ដែលនាំឲ្យប៉ះពាល់ដល់សុខភាពអ្នកដែលទទួលទានសាច់បែបនេះ។ តាមតួលេខក្រសួងកសិកម្មអាមេរិក ក្នុងមួយឆ្នាំៗ ស.រ.អា. បានលក់សាច់មកឲ្យរុស្ស៊ី ក្នុងទឹកប្រាក់ ៥០០លានដុល្លារ។
ក្នុង បទសម្ភាសន៍តាមកាណាល់ទូរទស្សន៍រដ្ឋរុស្ស៊ី គ្រូពេទ្យដើមខ្សែខាងអនាម័យ ទូទាំងសហព័ន្ធរុស្ស៊ី លោក Guennady Onishenko ដែលតែងមានទឹកមាត់ប្រៃ ហើយសេចក្តីសន្និដ្ឋានរបស់គាត់ ខាងអនុញ្ញាតឬហាមមិនឲ្យនាំចូលប្រទេសរុស្ស៊ី នូវគ្រឿងបរិភោគនេះនោះ រមែងបំពេញតាមដោយរដ្ឋាភិបាល។ គាត់បានពន្យល់បំភ្លឺថា៖ Ractopamine ជាថ្នាំសម្រាប់ព្យាបាលជម្ងឺហឺត ហើយសព្វថ្ងៃត្រូវគេឆ្លៀតប្រើវាសម្រាប់បំប៉នសាច់ដុំសត្វ ឲ្យវាឆាប់ធំកើនទម្ងន់តួខ្លួនវា ប៉ុន្តែដែលនាំឲ្យប៉ះពាល់ដល់សុខភាពអ្នកដែលទទួលទានសាច់បែបនេះ។
លោក Guennady Onishenko ក៏គូសបញ្ជាក់ថា៖ “ទន្ទឹមនឹងរុស្ស៊ី គឺមានប្រទេសដល់ទៅ ជាង១៦០ឯណោះ ដែលប្រកែកឈប់ទិញសាច់អាមេរិកាំងបែបនេះ។ ពួកអ្នកប្រាជ្ញរុស្ស៊ី បានតាក់តែងបញ្ជីទាមទារ ដែលមាន១៣ចំណុច ចំពោះថ្នាំ Ractopamine ហើយដែលភាគីរុស្ស៊ីប្រាថ្នាទទួលចម្លើយពីខាងស.រ.អា. តបនឹងចំណុចទាមទារទាំងនោះ”។
វេជ្ជបណ្ឌិតរុស្ស៊ីនេះចាប់អារម្មណ៍ជាពិសេស ទៅលើហេតុការណ៍ដែលថា “ស.រ.អា.មិនដែលលក់ទៅឲ្យបណ្តាប្រទេសអឺរ៉ុបឡើយ នូវសាច់បានមកពីសត្វដែលចិញ្ចឹម ដោយឲ្យវាស៊ីចំណីលាយជាមួយថ្នាំ Ractopamine”។
គាត់សង្កត់ធ្ងន់ថា៖ សំខាន់សែនសំខាន់ដែលរុស្ស៊ីត្រូវការឲ្យស.រ.អា. លាតត្រដាងសក្ខីកម្ម ដែលបញ្ជាក់ពីសុវត្ថិភាពនៃការប្រើថ្នាំនោះ បន្ថែមទៅលើចំណីសត្វ។
តាមកាសែតអាមេរិកាំង The New York Times ចុះផ្សាយ ក្រសួងកសិកម្ម ស.រ.អា.ចាត់ទុក ជាតិ Ractopamine ថាគ្មានគ្រោះថ្នាក់អ្វីទេ សម្រាប់សុខភាពមនុស្ស។ ប៉ុន្តែក្រសួងនេះ មិនលំអិតឡើយ តើក្នុងសាច់ដែលនាំចូលប្រទេសរុស្ស៊ី មានឬទេជាតិ Ractopamine ។
ក្រសួងកសិកម្ម ស.រ.អា. បានស្នើសុំរុស្ស៊ីឲ្យលើកទៅពេលក្រោយទៅ ការចូលជាធរមាននៃបម្រាមនោះ។ ក្នុងគោលដៅនេះ គណៈប្រតិភូនៃក្រសួងពាណិជ្ជកម្មអាមេរិកាំងនឹងមកកាន់ក្រុងម៉ូស្គូ ដើម្បីចរចាជាមួយភាគីរុស្ស៊ី។
សព្វថ្ងៃ ប្រទេសធំៗជាចម្បងដែលលក់សាច់មានគុណភាពមកឲ្យរុស្ស៊ី គឺមិនមែនសហភាពអឺរ៉ុបនិងអាមេរិកខាងជើង បែបយ៉ាង ស.រ.អា. និងកាណាដាឡើយ តែគឺប្រទេសអាមេរិកខាងត្បូងទេតើ បែបយ៉ាង Bresil , Uruguay , Paraguay ជាដើម។
ស្របនឹងទិន្នន័យនៃ “សមាគមរុស្ស៊ីខាងនាំសាច់ពីក្រៅ” ក្នុង១១ខែ នៃឆ្នាំ២០១២ កន្លងទៅ
រុស្ស៊ីបាននាំចូលគឺ សាច់គោ ៥៣៣.៣០០តោន ពីក្នុងនោះ ៤០.៨០០តោន គឺពីស.រ.អា, និងសាច់ជ្រូក ៦៣៩.៦០០តោន ពីក្នុងនោះ៧៧.៧០០តោន គឺពីស.រ.អា។ តាមក្រសួងកសិកម្មអាមេរិក ក្នុងមួយឆ្នាំៗ ស.រ.អា.បានលក់សាច់មកអោយរុស្ស៊ី ក្នុងទឹកប្រាក់ ៥០០លានដុល្លារ៕ដោយ កែវ ឆាយា (RFI)