ភ្លើងឆេះក្នុងយន្តហោះBoeing ៧៨៧ ផលិតដោយអាមេរិក
នៅសហរដ្ឋអាមេរិក កាលពីថ្ងៃចន្ទម្សិលមិញ គេឃើញមានភ្លើងឆេះ នៅក្នុងយន្តហោះ Boeing ៧៨៧ មួយគ្រឿង ហោះហើរដោយ ក្រុមហ៊ុនអាកាសចរណ៍ជប៉ុន Airlines ដែលទើបនឹងចុះចត នៅក្រុងបូស្តុន បន្ទាប់ពីធើ្វដំណើរពីទីក្រុង តូក្យូមក។ ហេតុការណ៍នេះ មិនបានបង្កជាគ្រោះថ្នាក់ រឺបណ្តាលអោយមានអ្នករបួសអ្វីឡើយ។ អ្នកដំណើរទាំង ១៧២នាក់ បានចាកចេញ ពីយន្តហោះមុននឹងមានហេតុការណ៍នេះ។ យន្តហោះ Boeing ៧៨៧ ជាប្រភេទយន្តហោះ ចុងក្រោយគេ ផលិតដោយសហរដ្ឋអាមេរិក។ ហេតុការណ៍ភ្លើងឆេះនេះ បានកើតឡើង នៅពេលដែលការផលិត យន្តហោះ Boeing ៧៨៧ កំពុងតែមានការកើនឡើង។ អជ្ញាធរអាមេរិក បានចាត់ការស៊ើបអង្កេតរកមូលហេតុនៃអគ្គិភ័យនេះ។
ហេតុការណ៍ភ្លើងឆេះ បានកើតឡើងបន្ទាប់ពី យន្តហោះBoeing ៧៨៧ ចុះចតនៅក្រុង Boston ស្ថិតនៅភាគឥសាន សហរដ្ឋអាមេរិក។ អ្នកដំណើរទាំង ១៧២នាក់ បានចាកចេញ ពីយន្តហោះ មុននឹងមានហេតុការណ៍នេះ កើតឡើង។
គេឃើញផ្សែងភ្លើង ចាប់ផ្តើមហុយចេញពីផ្នែកខាងក្រោយ របស់យន្តហោះ។ ប៉ុន្តែគ្មានគ្រោះថ្នាក់ រឺក៏មនុស្សណាម្នាក់ ទទួលរងនូវរបួសអ្វីឡើយ។ ក្រុមពន្លត់អគ្គិភ័យ បានចុះមកពន្លត់ភ្លើងដែលទើបនឹងឆេះ ហើយក្រុមហ៊ុនជប៉ុន អ៊ែរឡាញ បានបញ្ជាក់ថា មានផ្ទុះនូវចំណុចមួយ នៅក្នុងប្រព័ន្ធផ្គត់ផ្គង់ចរន្តអគ្គិសនី។ អជ្ញាធរអាមេរិក បានបញ្ជូនអធិការរបស់ខ្លួន ទៅក្រុង Boston ដើម្បីធ្វើការស៊ើបអង្កេត រកមូលហេតុនៃអគ្គិភ័យ។
យន្តហោះធុន Boeing ៧៨៧ Dreamliner ជាប្រភេទយន្តហោះ ផលិតដោយសហរដ្ឋអាមេរិក។ ហេតុការណ៍ភ្លើងឆេះនេះ បានកើតឡើង នៅពេលដែលអាមេរិក បង្កើនការផលិត យន្តហោះ Boeing ៧៨៧ ដែលជាប្រភេទយន្តហោះ ដាក់ចេញអោយប្រើ ចុងក្រោយគេបង្អស់។ មួយភាគបី នៃតួយន្តហោះនេះ ត្រូវបានក្រុមហ៊ុនជប៉ុនផ្សេងៗ ធ្វើការផលិត។
ក្រុមហ៊ុនអាកាសចរជប៉ុន អ៊ែរឡាញ ជាអតិថិជនសំខាន់ ដែលទិញប្រើយន្តហោះ ប្រភេទ Boeing ៧៨៧ នេះពីអាមេរិក។ ក្រុមហ៊ុននេះ បានកុំម៉ង់ទិញយន្តហោះ នេះ ៤៥គ្រឿង មកហើយ ហើយចាប់ប្រើវា ក្នុងការហោះហើរ តាំងពីឆ្នាំ ២០១២ មកម្ល៉េះ៕ដោយ ព្រំ សឿន សូលីណា (RFI)
