បើករថយន្តបុកទ្រូងផ្លូវ ក្រឡាប់បោកត្រូវរថយន្តមួយគ្រឿងទៀត
ភ្នំពេញ៖ កាលពីវេលាម៉ោង២៣និង១០នាទី យប់ថ្ងៃទី០៧ ខែមករា គ្រោះថ្នាក់ចរាចរមួយ ដែលបង្កឡើង ដោយរថយន្តកាមរី បើកបុក បាក់ក្បាលរបាំងថ្មចំនួន ០១កង់ និងរបាំងថ្ម បែងចែក ទ្រូងផ្លូវ ចំនួន៣កង់ ហើយក្រឡាប់ ទៅប៉ះ រថយន្ត កូរ៉ូឡាមួយគ្រឿង ស្ថិតនៅត្រង់មហាវិថីព្រះសីហនុ ក្នុងសង្កាត់វាលវង់ ខណ្ឌ៧មករា ។
មន្រ្តីនគរបាលចរាចរណ៍ជើងគោក បានឲ្យដឹងថា រថយន្តបង្ក ម៉ាកកាមរី ពណ៌ទឹកប្រាក់ ពាក់ស្លាកលេខ ភ្នំពេញ 2N-8191 ចំណែករថយន្ត កូរ៉ូឡា រងគ្រោះ ពាក់ស្លាក លេខ ភ្នំពេញ 2A-0382 ។
មន្រ្តីនគរបាលចរាចរណ៍ដដែលបានឲ្យដឹងថា មុនពេលកើតហេតុ គេបានឃើញរថយន្ត កាមរី បើកតាមបណ្តោយមហាវិថីព្រះសីហនុ ពីទិសខាងកើតមក លិច លុះមកដល់ ចំណុចកើតហេតុខាងលើ ក៏បុកក្បាលរបាំងថ្មបែងចែកទ្រូងផ្លូវ ហើយក្រឡាប់ទៅបោក នឹងរថយន្ត ម៉ាកកូរ៉ូឡា ពណ៌ឈាមជ្រូក តែម្តង។ អ្នកបើកបរ រថយន្តកូរ៉ូឡា ឈ្មោះ ឡាយ គឹមឆែ ភេទប្រុស អាយុ២២ឆ្នាំ មានទីលំនៅផ្ទះលេខ៣៦៤ ផ្លូវចោមចៅ ភូមិព្រៃជីសាក់ សង្កាត់ចោមចៅ ខណ្ឌពោធិ៍សែន ជ័យ ក្រោយពេលកើតហេតុអ្នកបើកបររថយន្តកាមរី គេចខ្លួនបាត់ ។
ក្រោយកើតហេតុរថយន្តទាំង ០២គ្រឿង ត្រូវបាននគរបាលចរាចរណ៍ជើងគោកយកទៅ រក្សាទុកនៅការិយាល័យដើម្បីរង់ចាំម្ចាស់ធ្វើការដោះស្រាយ៕
ដោយ៖ ហេង នាង
