ឃាត់ខ្លួនជនជាតិចិនជាង ៥០នាក់ពាក់ព័ន្ធករណីជំរិតទារប្រាក់តាមអ៊ីនធឺណិត
ភ្នំពេញ ៖ កាលពីព្រឹកថ្ងៃទី៥ ខែមករា កម្លាំងសន្តិសុខផ្ទៃក្នុងរបស់ក្រសួងមហាផ្ទៃសហ ការជាមួយនឹងសមត្ថកិច្ច មូលដ្ឋានក្រោមការដឹកនាំពីស្ថាប័នតុលាការបានធ្វើការឆែកឆេរ ទីតាំងជាច្រើនដែលបានជួលឲ្យជនបរទេសជាជនជាតិចិនស្នាក់នៅ ក្នុងខណ្ឌចំនួន៣គឺខណ្ឌឬស្សីកែវ ខណ្ឌមានជ័យ និងខណ្ឌទួលគោក បានឃាត់ខ្លួនក្រុមជនសង្ស័យជនជាតិចិនប្រុសជ និងស្រីទាំងជាង៥០នាក់យកមកសួរនាំពាក់ព័ន្ធទៅនឹងករណីជំរិតទារប្រាក់តាមអ៊ីនធឺណិត។
បើតាមការឲ្យដឹងពីមន្ត្រីនគរបាលដែលចុះអនុវត្តការងារនេះបានប្រាប់ថា នៅក្នុងទីតាំងខណ្ឌមានជ័យស្ថិតនៅផ្ទះ១២៩២ ផ្លូវ3BT ក្រុម៣ ភូមិចំរើនផល សង្កាត់បឹងទំពុន ខណ្ឌ មានជ័យ សមត្ថកិច្ចបានឃាត់ខ្លួនជនជាតិចិនចំនួន១៩នាក់ក្នុងនោះស្ត្រីម្នាក់។ នៅក្នុងខណ្ឌឫស្សីកែវ សមត្ថកិច្ចបានឃាត់ខ្លួនជនជាតិចិនចំនួន២នាក់ ក្នុងសង្កាត់ជ្រោយចង្វា និងបន្តឆែកទីតាំងផ្សេងៗទៀត។
ចំណែកនៅក្នុងខណ្ឌទួលគោកសមត្ថកិច្ចបានឆែកទីតាំងចំនួន៤គឺទី១ ឆែកឆេរនៅផ្ទះលេខ៩ ផ្លូវ៣៣៧ សង្កាត់បឹងកក់១, ទីតាំងទី២នៅផ្ទះលេខ៥៩ ផ្លូវ៣១៣ សង្កាត់បឹងកក់២, ទីតាំងទី៣ផ្ទះលេខ៤០C ផ្លូវ ៦០៦ សង្កាត់បឹងកក់២ និងទីតាំងទី៤នៅផ្ទះលេខ១០២ ផ្លូវ២៦១ សង្កាត់ទឹកល្អក់១ ដោយ៤ទីតាំងខាងលើរកឃើញជនជាតិចិនចំនួន៣៩នាក់ ក្នុង នោះស្ត្រី១០នាក់៕
