ជនជាតិចិនស្រវឹងបើករថយន្តបុកម៉ូតូ របួសធ្ងន់ម្នាក់
ភ្នំពេញ៖ កាលពីវេលាម៉ោង ១១ និង៣០នាទីអធ្រាត្រ ថ្ងៃ៦ មករា ជនជាតិចិនម្នាក់ស្រវឹងបើករថយន្តលឿនជ្រុលចង្កូតបុកម៉ូតូមួយគ្រឿងនៅចំណុចផ្លូវខ្វែង បណ្តាលឲ្យអ្នកបើកម៉ូតូរងរបួសធ្ងន់ ស្ថិតនៅចំណុចផ្លូវលេខ៩០ កែង៦១ ស្ថិតក្នុងសង្កាត់វត្តភ្នំ ខណ្ឌដូនពេញ។
ប្រភពព័ត៌មានពីកន្លែងកើតហេតុបានឲ្យដឹងថា រថយន្តបង្កម៉ាក LEXUS LS 430 ពណ៌ខ្មៅ ពាក់ស្លាកលេខ ភ្នំពេញ 2L-3010 បើកបរដោយបុរសជនជាតិចិន និងរួមដំណើរជាមួយស្ត្រីម្នាក់ មិនត្រូវបានស្គាល់អត្តសញ្ញាណ។ ជនជាតិចិនរូបនោះ បើករថយន្តក្នុងទិសដៅពីលិចទៅកើត តាមផ្លូវលេខ៩០ លុះមកដល់ចំណុចកើតហេតុ ក៏បានបុកម៉ូតូម៉ាកគុបជ្រុងសេ៩០ ពណ៌ទឹកប៊ិក ពាក់ស្លាកលេខ កំពត 1A-5238 បើកបរដោយបុរសម្នាក់មិនត្រូវបានស្គាល់ អត្តសញ្ញាណក្នុងទិសដៅពីជើងទៅត្បូង បណ្ដាលឲ្យរងរបួសធ្ងន់។
បន្តាប់ពីបុកម៉ូតូបណ្តាលឲ្យអ្នកបើកបររងរបួសធ្ងន់ ចំណែករថយន្តនៅមិនទាន់អស់ល្បឿន បានជ្រុលចង្កូតបុកចូលការដ្ឋានសំណង់ក្រសួងសេដ្ឋកិច្ច និងហិរញ្ញវត្ថុ សំណាងល្អមិនបណ្តាលឲ្យអ្នកបើកបរ និងអ្នករួមដំណើររងរបួសនោះ។
ក្រោយកើតហេតុ អ្នករងរបួសត្រូវបានដឹកទៅសង្គ្រោះនៅមន្ទីរពេទ្យកាល់ម៉ែត រីឯរថយន្តបង្ក រួមនឹងម៉ូតូរងគ្រោះ ត្រូវបានប៉ូលិសចរាចរណ៍ខណ្ឌ វាស់វែងយកទៅរក្សាទុកនៅការិយាល័យចរាចរណ៍គោករង់ចាំដោះស្រាយគ្នាជាក្រោយ៕
ដោយ៖ ហេង នាង
