បត់រថយន្តអត់ស៊ីញ៉ូកៀរម៉ូតូ ដួលរងរបួសធ្ងន់ ២នាក់
ភ្នំពេញ ៖ កាលពីវេលាម៉ោង ៩និង ៤០នាទីយប់ថ្ងៃទី៣ មករា បុរស ២នាក់ ជិះម៉ូតូពីក្រោយរថយន្តដីហុយខ្លាំងពេក ជិះវ៉ារថយន្តទៅទនឹ្ទមរថយន្តបត់ឆ្វេងអត់ស៊ីញ៉ូ បណ្តាលឲ្យរថយន្តកៀរដួលរងរបួសធ្ងន់ទាំង ២នាក់ ស្ថិតតាមមហាវិថីព្រះមុនីរ៉េត កែងផ្លូវបេតុង ក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ។
ប្រភពព័ត៌មានបានឲ្យដឹងថា រថយន្តម៉ាក FUSO ពណ៌បៃតងឆ្នូតស បើកតាមមហាវិថីព្រះមុនីរ៉េត ពីជើងទៅត្បូង ស្របទិសគ្នាជាមួយម៉ូតូសេ១២៥ ស៊េរី២០១២ ពណ៌ខ្មៅ ជិះគ្នា២នាក់ ខណៈមកដល់ចំណុចផ្លូវកែង រថយន្តបត់ឆ្វេងអត់ស៊ីញ៉ូ ចំណែកម៉ូតូជិះពីក្រោយរថយន្តហុយខ្លាំងពេក បានជិះវ៉ារថយន្តទៅទន្ទឹមនឹងរថយន្ត ស្រាប់តែរថយន្តបត់ឆ្វេង ធ្វើឲ្យកៀរដួលរងរបួស ធ្ងន់ទាំង២នាក់ ។
ជនរងគ្រោះរបួសធ្ងន់ ២នាក់ មានឈ្មោះ វៃ ភេទប្រុស អាយុ ២៧ឆ្នាំ មុខរបរកម្មកររោងចក្រកាត់ដេរ និងម្នាក់ទៀតឈ្មោះ វី ភេទប្រុស អាយុ ២៨ឆ្នាំ ជាកម្មករលីសែង ស្នាក់នៅផ្ទះជួលនៅម្តុំចំការដូង សង្កាត់ដង្កោ ខណ្ឌដង្កោ ។
ក្រោយពេលកើតហេតុ ត្រូវរថយន្តសង្គ្រោះដឹកយកទៅព្យាបាល នៅមន្ទីរពេទ្យមិត្តភាពខ្មែរសូវៀត ចំណែករថយន្តបង្ក និងម៉ូតូ ត្រូវសមត្ថកិច្ចយកទៅ រក្សាទុកនៅខណ្ឌមានជ័យ ៕
