ជិះម៉ូតូទៅបុករថយន្តរងរបួសធ្ងន់
ភ្នំពេញ៖ កាលពីវេលាម៉ោង១១និង៤០នាទីយប់ ថ្ងៃទី២ ខែមករា បុរសម្នាក់បានជិះម៉ូតូមួយគ្រឿងបើកបរយ៉ាងលឿន ជាន់ហ្វ្រាំងមិនទាន់ ក៏ទៅបុករថយន្តមែកសឺដេស ខណៈពេលដែលរថយន្តកំពុងបើកបរ ហើយបត់ឆ្វេងឡើងទៅផ្លូវ១៥៤ដែល តាមបណ្ដោយមហាវិថីព្រះនរោត្តម ចំណុចស្តុបរោងកុនលុច ក្នុងសង្កាត់ផ្សារថ្មី៣ ខណ្ឌដូនពេញ។
ប៉ូលិសចរាចរណ៍ខណ្ឌដូនពេញបានឲ្យដឹងថា មុនពេលកើតហេតុម៉ូតូសង់កូរ៉េ ជិះដោយបុរសម្នាក់ តាមបណ្ដោយមហាវិថីព្រះនរោត្តម ពីត្បូងទៅជើង ក្នុងល្បឿនលឿន ជាន់ហ្វ្រាំងមិនទាន់ ក៏ទៅបុករថយន្តមែកសឺដេស ក្នុងទិសដៅបញ្ច្រាសទិសគ្នា ជាមួយរថយន្តដែលរៀបនឹងបត់ឆ្វេងឡើងទៅផ្លូវ១៥៤ ក៏បណ្ដាលឲ្យម៉ូតូដួលបោកទៅនិងថ្នល់ រងរបួសជាទម្ងន់ ត្រូវរថយន្តសាមុយដឹកយកទៅសង្គ្រោះនិងព្យាបាលភ្លាមៗ។
ដោយឡែកររថយន្តមែកសឺដេស បានព្យាយាមបើករត់កេចខ្លួន រហូតដល់ក្រោយមន្ទីរពេទ្យកុមារជាតិ នៅចំណុចផ្លូវ១២២ ក្នុងសង្កាត់ទឹកល្អក់១ ទើបប៉ូលិសតាមឃាត់បាន តែអ្នកបើកបរបានចុះពីលើរថយន្តគេចខ្លួនបាត់។ ក្រោយពីកើតហេតុរថយន្តនិងម៉ូតូត្រូវបានប៉ូលិសយកទៅរក្សាទុកនៅចរាចរផ្លូវគោករាជធានីភ្នំពេញ៕
ដោយ៖ ហេង នាង
