ស្រវឹងបើករថយន្តទៅបុកម៉ូតូបណ្ដាលឲ្យរបួសធ្ងន់ពីរនាក់
ភ្នំពេញ៖ កាលពីវេលាម៉ោង២០និង៥០នាទីយប់ ថ្ងៃទី០១ មករា បុរសម្នាក់បានរងរបួសធ្ងន់ដាច់សសៃកែងជើងនិងស្ត្រីម្នាក់ទៀតបាន រងរបួសបែកមុខបែកមាត់ ដោយសារស្រវឹងបើករថយន្តជ្រុលទៅបុកម៉ូតូមួយគ្រឿង នៅចំណុចមុខហាង ផស អេឌីសិន ស្ថិតតាមបណ្ដោយផ្លូវលេខ១៥៤ ស្ថិតក្នុងសង្កាត់ផ្សារថ្មីទី១ ខណ្ឌដូនពេញ
បុរសនិងស្ត្រីដែលរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ ខាងលើនេះ ពុំទាន់បានស្គាល់អត្តសញ្ញាណនៅឡើយទេ ។
មុនពេលកើតហេតុគេឃើញរថយន្តមួយគ្រឿង ម៉ាកកាមរីឆ្លាម ពណ៌ខ្មៅ ពាក់ស្លាកលេខភ្នំពេញ2S-4586 បើកបរដោយបុរសជនជាតិចិនម្នាក់ ដែលទើបនឹងចេញពីខារ៉ាអូខេនៅម្តុំខាងក្រោយផ្សារទំនើបសូរិយា ហើយធ្វើដំណើរតាមបណ្ដោយផ្លូវលេខ១៥៤ យ៉ាងលឿនក្នុងទិសដៅពីលិចទៅកើត លុះពេលបើកមកដល់ចំណុចកើតហេតុខាងលើ រថយន្តកាមរីឆ្លាមបានរេចង្កូតទៅបុកម៉ូតូមួយគ្រឿងទៀត ម៉ាកសង់កូរ៉េ ពណ៌ក្រហម ពាក់ស្លាកលេខ ស្វាយរៀង1B-4180ដែលជិះគ្នាពីនាក់ប្រុសម្នាក់និងស្រីម្នាក់ ដែលធ្វើដំណើរក្នុងទិសដៅបញ្ច្រាសគ្នាយ៉ាងពេញទំហឹងបណ្ដាលឲ្យបុរសជា ម្ចាស់ម៉ូតូរងរបួសដាច់សសៃកែងជើងនិងស្ត្រីម្នាក់ដែលជិះពីក្រោយ បានរងរបួសបែកមុខបែកមាត់។
ក្រោយពេលកើតហេតុជនរងគ្រោះទាំងពីរនាក់ត្រូវបានដឹកតាមរថយន្តសាមុយ ដឹកយកទៅសង្គ្រោះបន្ទាន់នៅមន្ទីរពេទ្យ។ ចំណែករថយន្តបង្កហេតុនិងម៉ូតូត្រូវបានសមត្ថកិច្ចមូលដ្ឋានចុះទៅ ធ្វើការវាស់វែងដកហូតយកទៅរក្សាទុកនៅអធិការរដ្ឋាននគរបាលខណ្ឌ ដូនពេញរង់ចាំការដោះស្រាយតាមផ្លូវច្បាប់៕
ដោយ៖ ហេង នាង
