បុរសម្នាក់ជិះម៉ូតូទៅបុកគល់ស្ពានព្រះមុនីវង្សចាស់រងរបួសធ្ងន់
ភ្នំពេញ៖ កាលពីវេលាម៉ោង២៣និង៤០នាទីយប់ ថ្ងៃទី០១ មករា បុរសម្នាក់ស្រវឹងស្រាជោគជិះម៉ូតូលឿនជ្រុលទៅបុកគល់ស្ពានព្រះមុនីវង្សចាស់ខាងកើត បណ្ដាលឲ្យម្ចាស់ម៉ូតូផ្លោងធ្លាក់ទៅក្រោមស្ពានរងរបួសធ្ងន់សន្លប់ បាត់ស្មារតី ហេតុការណ៍នេះ កើតឡើង ស្ថិតក្នុងសង្កាត់ច្បារអំពៅទី១ ខណ្ឌមានជ័យ។
ប្រភពព័តមាននៅកន្លែងកើតហេតុបានឲ្យដឹងថាមុនពេលកើតហេតុគេ ឃើញបុរសម្នាក់ឈ្មោះ ជា ជឿន អាយុ២៥ឆ្នាំ ស្នាក់នៅសង្កាត់ចាក់អង្រែលើ ជិះម៉ូតូមួយគ្រឿងម៉ាកស្មាស ស៊េរី២០១០ ពណ៌ខ្មៅ ពាក់ស្លាកលេខ ភ្នំពេញ 1Q-7339 ជិះតាមបណ្ដោយផ្លូវជាតិលេខ១ក្នុងទិសដៅពីកើតទៅលិចក្នុងល្បឿន យ៉ាងលឿន លុះពេលបើកមកដល់ចំណុចកើតហេតុខាងលើស្រាប់តែឈ្មោះ ជា ជឿន ជ្រុលចង្កូតទៅបុកគល់ស្ពានព្រះមុនីវង្សចាស់ខាងកើត យ៉ាងពេញទំហឹង បណ្ដាលឲ្យម្ចាស់ម៉ូតូផ្លោងទៅធ្លាក់នៅក្រោមស្ពានរងរបួសធ្ងន់ សន្លប់បាត់ស្មារតីភ្លាមៗតែម្តង។ ចំណែកម៉ូតូវិញនៅជាប់នៅនឹកគល់ស្ពាន រងការខូចខាតផ្នែកខាងមុខយ៉ាងដំណំ។
ក្រោយពេលកើតហេតុបុរសរងគ្រោះខាងលើនេះត្រូវបានរថយន្តសាមុយដឹក យកទៅសង្គ្រោះបន្ទាន់នៅមន្ទីរពេទ្យ។ ចំណែកម៉ូតូវិញត្រូវបានសមត្ថកិច្ចមូលដ្ឋានយកទៅរក្សាទុកនៅ ប៉ុស្តិ៍ច្បារអំពៅទី១៕
ដោយ៖ ហេង នាង
