ជិះម៉ូតូទាក់ដៃចង្កូតជាប់នឹងខ្សែចងនំនៅលើរ៉ឺម៉កម៉ូតូដួលចូលក្រោមរ៉ឺម៉ក
ភ្នំពេញ ៖ កាលពីវេលាម៉ោង ៨និង៣០ នាទីយប់ថ្ងៃទី២៧ ធ្នូ ម៉ូតូស៊ុយស៊ូគី AXFLO ជិះទៅទាក់ដៃចង្កូតម៉ូតូជាប់នឹងខ្សែចងនំកញ្ចប់នៅលើរ៉ឺម៉ក បណ្តាលឲ្យម៉ូតូដួលចូលក្រោមរ៉ឺម៉ក មនុស្សខ្ទាតចេញក្រៅ រងរបួសស្រាល ២នាក់ ស្ថិតនៅតាមមហាវិថីព្រះមុនី្នរ៉េតកែង២៥១ ក្នុងសង្កាត់បឹងសាឡាង ខណ្ឌទួលគោក ។
សាក្សីឃើញហេតុការណ៍បានឲ្យដឹងថា រ៉ឺម៉កដឹកនំកញ្ចប់សំពីងសំពោង បើកតាមមហាវិថីព្រះ មុនីរ៉េត ពីកើតទៅលិច ស្របគ្នាជាមួយម៉ូតូស៊ុយស៊ូគី AXFLO ពណ៌ខៀវ ជិះគ្នា២នាក់ ស្រីម្នាក់ប្រុសម្នាក់ ខណៈមកដល់ចំណុចខាងលើ ម៉ូតូបានជិះទៅទាក់ដៃចង្កូតជាមួយខ្សែចងរឹតនំនៅជាប់រ៉ឺម៉កនោះ បណ្តាលឲ្យដួលខ្ទាតម៉ូតូចូលក្រោមរ៉ឺម៉ក ចំណែកអ្នកជិះម៉ូតូខ្ទាត ចេញក្រៅ រងរបួសស្រាល ។
ក្រោយពេលកើតហេតុ ខាងតំណាងម្ចាស់នំនោះ បានមកធ្វើការចរចានៅកន្លែងកើតហេតុ ដោយសងសំណងទៅម្ចាស់ម៉ូតូចំនួន ៤០ដុល្លារ៕
ដោយ៖ ហេង នាង
