ម៉ូតូ បុកម៉ូតូបណ្តាលឲ្យសន្លប់ ៣នាក់
ភ្នំពេញ ៖ វេលាម៉ោង១០ និង៣០ នាទីយប់ថ្ងៃទី២៧ ធ្នូ ម៉ូតូសេ១២៥ ស៊េរី២០០៨ ពណ៌ខ្មៅ ស្រវឹងស្រាជិះទៅបុកម៉ូតូស្តេប ចំពីមុខពេញទំហឹង បណ្តាលឲ្យអ្នកជិះម៉ូតូសន្លប់ទាំង ៣នាក់ ស្ថិតនៅតាមមហាវិថីព្រះនរោត្តមកែងផ្លូវលេខ៣១០ ក្នុងសង្កាត់បឹងកេងកងទី១ ខណ្ឌចំការមន ។
សាក្សីឃើញហេតុការណ៍បានឲ្យដឹងថា ម៉ូតូសេ១២៥ ស៊េរី២០០៨ ពណ៌ខ្មៅ បើកបរក្នុងស្ថានភាពស្រវឹង ជិះតាមផ្លូវលេខ៣១០ ពីលិចទៅកើត ចំណែកម៉ូតូស្តេប ពណ៌ផ្កាឈូក ជិះគ្នា២នាក់ តាមមហាវិថីព្រះនរោត្តម ពីជើងទៅត្បូង ខណៈមកដល់ចំណុចផ្លូវកែង ម៉ូតូទាំងពីរគ្រឿង បានបុកគ្នាចំពីមុខពេញទំហឹង លាន់ដូចរន្ទះ បណ្តាលឲ្យអ្នកជិះម៉ូតូសន្លប់ទាំង ៣នាក់ មួយសន្ទុះ ទើបដឹងខ្លួនវិញ ។
ក្រោយពេលកើតហេតុ ភាគីខាងជិះម៉ូតូសេ១២៥ ស្រវឹងស្រា និយាយស្តាប់គ្នាមិនបាន តែដោយសារផ្ទះនៅជិតកន្លែងកើតហេតុ មានសាច់ញាតិមកជួយធ្វើអន្តរាគមន៍សងសំណងទៅភាគីម្ចាស់ម៉ូតូស្តេប ចំនួន ៥០ដុល្លារ ដើម្បីបញ្ចប់រឿង នៅកន្លែងកើតហេតុ ៕
ដោយ៖ ហេង នាង