ចេញពីធ្វើការឌុបប្អូនទៅផ្ទះ បុកគូទរ៉ឺម៉កសន្លប់ទាំងពីរនាក់
ភ្នំពេញ៖ កាលពីវេលាម៉ោង៦និង៣០នាទី ល្ងាចថ្ងៃទី២៦ ខែធ្នូ ពីរនាក់បងប្អូន ពេលចេញពីធ្វើការពេលល្ងាចបានឌុបគ្នាត្រឡប់ទៅផ្ទះវិញ ដោយសារតែ ជិះលឿនពេក គេចរ៉ឺម៉កមិនទាន់ក៏ជ្រុលចង្កូតទៅបុករ៉ឺម៉កបណ្តាលឲ្យរងរបួសធ្ងន់ទាំងពីរនាក់បងប្អូន ស្ថិតនៅតាមបណ្តោយផ្លូវជាតិលេខ៣ភូមិវត្តសែ្លង សង្កាត់ពងទឹក ខណ្ឌដង្កោរាជធានី ភ្នំពេញ។
យោងតាមសាក្សីនៅកន្លែងកើតហេតុបានឲ្យដឹងថា ជនរងគ្រោះទាំងពីរទី១មានឈ្មោះ ស្មាន ស៊ុល ភេទប្រុសអាយុ២២ឆ្នាំ មានមុខរបរជាសន្តិសុខ អាយប៊ីអាយ រងរបួសធ្ងន់ និងប្អូនស្រីមានមុខរបរជាកម្មកររោងចក្រ មហា ហ្គាមិន ខូអិលធីឌី រងរបួសធ្ងន់។
ជនរងគ្រោះទាំងពីរនាក់បងប្អូនត្រូវបានក្រុមសង្គ្រោះ អង្គភាព៧១១ កងពលតូចលេខ៧០ដឹកតាមរថយន្តសង្គ្រោះយកទៅសង្គ្រោះនៅមន្ទីរពេទ្យព្រះកុសមៈ ហៅមន្ទីរពេទ្យលោកសង្ឃ អ្នកទាំងពីរជិះម៉ូតូមួយគ្រឿងមិនចាំម៉ាក។ ចំណែក ឯរ៉ឺម៉កបន្ទាប់ពីកើតហេតុបានបើកហួសទៅបាត់តែម្តង៕
ដោយ៖ ហេង នាង
