ក្រុមប្រឹក្សាឃ្លាំមើលកម្ពុជាសូមឱ្យតុលាការដោះលែងពលរដ្ឋបឹងកក់១៣នាក់
ក្រុមប្រឹក្សាឃ្លាំមើលកម្ពុជា សូមឱ្យតុលាការរាជធានីភ្នំពេញលើកលែងទោស និងដោះលែងប្រជាពលរដ្ឋបឹងកក់ទាំង ១៣នាក់ ឱ្យមានសេរីភាព ហើយសូមឲ្យរាជរដ្ឋាភិបាលកម្ពុជា ធ្វើការដោះស្រាយដោយសន្ដិវិធី (ច្បាប់) មិនត្រូវប្រើកម្លាំងប្រដាប់អាវុធមកដោះស្រាយសម្រាប់ប្រជារាស្ត្រស្លូតត្រង់នោះទេ។
សេចក្តីថ្លែងការណ៍ របស់តំណាងក្រុមប្រឹក្សាឃ្លាំមើលកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ ធ្វើនៅរាជធានីភ្នំពេញ ថ្ងៃទី២៥ ឧសភា ២០១២ បានលើកឡើងថា ស្ថានភាពសិទ្ធិមនុស្សនៅកម្ពុជា កាន់តែធ្ងន់ធ្ងរទៅៗ ដែលអាជ្ញាធរក្រុងភ្នំពេញបានប្រើប្រាស់កម្លាំងប្រដាប់អាវុធ មកលើប្រជាពលរដ្ឋខ្លួនឯង ដើម្បីការពារផលប្រយោជន៍ក្រុមហ៊ុនទៅវិញ ហើយការដឹកនាំដែលជ្រើសរើសយកវិធីដោះស្រាយ តាមកម្លាំងប្រដាប់អាវុធបែបនេះ មានន័យថា អ្នកដឹកនាំកម្ពុជា កំពុងបោះជំហានងាកចេញពីគន្លងប្រជាធិបតេយ្យ ដើម្បីជាយន្តការដោះស្រាយជូនប្រជារាស្ត្រស្លូតត្រង់។
សូមបញ្ជាក់ថា ចៅក្រមជំនុំជម្រះនៃសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសស្ត្រី ១២នាក់ ឱ្យជាប់ពន្ធនាគារក្នុងម្នាក់ៗពីរឆ្នាំកន្លះ តែអនុវត្តក្នុងពន្ធនាគារយៈពេលពីរឆ្នាំ ពីបទ ចូលកាន់កាប់អចលនវត្ថុនីតិបុគ្គលសាធារណៈ និងប្រឆាំងនឹងអ្នករាជការសាធារណៈ និងស្ត្រីចំណាស់វ័យ ៧២ឆ្នាំ ម្នាក់ ត្រូវបានតុលាការសម្រេចផ្តន្ទាទោស ដាក់ពន្ធនាគាររយៈពេលពីរឆ្នាំកន្លះ តែអនុវត្តក្នុងពន្ធនាគារយៈពេលមួយឆ្នាំ ពីបទចោទប្រកាន់ខាងលើនេះ៕
