បត់រថយន្តឆ្លងផ្លូវបុកម៉ូតូរងរបួសធ្ងន់ ស្រាលពីរនាក់
ភ្នំពេញ៖ កាលពីវេលា១១៖២០នាទីយប់ថ្ងៃទី២៦ ខែធ្នូ ឆ្នាំ២០១២យុវជនពីរនាក់ បានរង របួសធ្ងន់ស្រាល ក្រោយពីពួកគេ ត្រូវរថយន្តមួយគ្រឿងបានបើកបុក ស្ថិតនៅត្រង់ចំណុច គល់ស្ពាន ជ្រោយចង្វារ ត្រើយខាងកើត លើផ្លូវជាតិលេខ៦អា ស្ថិតក្នុង សង្កាត់ជ្រោយចង្វារ ខណ្ឌប្ញស្សីកែវ។
ជនរងគ្រោះទាំង ២នាក់ ទី១ ឈ្មោះ ជៀត គំរោង ភេទប្រុស អាយុ១៩ឆ្នាំ មានទីលំនៅភូមិខ្ទរ សង្កាត់ព្រែកលៀប ខណ្ឌប្ញស្សីកែវ ទី២ ឈ្មោះ វ៉ា សុជាតា ភេទប្រុស អាយុ២០ឆ្នាំ មានទីលំនៅភូមិទួលគោក សង្កាត់ទួលសង្កែ ខណ្ឌប្ញស្សីកែវ។
មន្រ្តីនគរបាលចរាចរ និងសមត្ថកិច្ចមូលដ្ឋាន បានឲ្យដឹងថា គ្រោះថ្នាក់ចរាចរណ៍មួយ កើតឡើង ដោយសាររថយន្ត ម៉ាក KIATITAN ពណ៌ស ពាក់ស្លាកលេខភ្នំពេញ 2D-5682 បានធ្វើដំណើរតាមបណ្តោយ ស្ពានជ្រោយចង្វារ ពីទិសខាងលិចមកកើត (ចេញពីភ្នំពេញ) លុះមកដល់ចំណុច កើតហេតុខាងលើ បានបត់ឆ្វេងឆ្លងផ្លូវ ក៏បុកជាមួយម៉ូតូមួយគ្រឿង ដែលធ្វើដំណើរ ច្រាសទិសគ្នា ម៉ាក HONDA SL ពណ៌ខ្មៅ ពាក់ស្លាកលេខភ្នំពេញ1AN-3383។
បច្ចុប្បន្ន ម៉ូតូ និងរថយន្ត ត្រូវបាន រក្សាទុក នៅការិយាល័យ នគរបាលចរាចរណ៍ និងអ្នកបើករថយន្តបង្កហេតុ នឹងបញ្ជូនទៅកាន់សាលា ដំបូងរាជធានីភ្នំពេញ ដើម្បីចាត់ការតាមនីតិវិធី៕
ដោយ៖ ហេង នាង
