ស្ត្រីម្នាក់រងរបួសធ្ងន់ ២នាក់រងរបួសស្រាល ដោយបុរស ២នាក់ជិះម៉ូតូកៀរ
ភ្នំពេញ ៖ កាលពីវេលាម៉ោង៧យប់ថ្ងៃទី ២៥ ខែធ្នូ ស្ថិតនៅម្ដុំភោជនីយដ្ឋាន«ម្លិះ៧៧» តាមបណ្ដោយផ្លូវលេខ១០១៩ ក្បែរទីស្នាក់ការប៉ូលិសប៉ុស្តិ៍ទឹកថ្លា ខណ្ឌសែនសុខ ស្ត្រីម្នាក់បានរងរបួសធ្ងន់ និង២នាក់ទៀតរងរបួសស្រាល ដោយបុរស២នាក់ ដែលមានទីលំនៅក្បែរគ្នាជិះម៉ូតូមកតាមធាក់ផ្ដួលម៉ូតូរបស់ពួកនាង ព្រោះតែរឿងតាមស្រឡាញ់មិនបាន ។
នារីៗរងគ្រោះមានទី១. ឈ្មោះ ស៊ឹម ចាន់ធឿន អាយុ២៤ឆ្នាំ ទី២. ឈ្មោះ ស្រី អូន អាយុ១៩ឆ្នាំ ជាសិស្ស ទី៣. ឈ្មោះ សៀង ថាវរី អាយុ២៥ឆ្នាំ។ ពួកនាងទាំង៣នាក់ជាបងប្អូនជូនមួយនឹងគ្នា និងមានទីលំនៅក្នុងភូមិថ្មី សង្កាត់ភ្នំពេញថ្មី ខណ្ឌសែនសុខ។
តាមការអះអាងរបស់នារីៗជាជនរងគ្រោះនិយាយថា ខណៈពេលនាងកំពុងធ្វើដំណើររួមគ្នាដោយម៉ូតូមួយគ្រឿងម៉ាកអាយខន ពាក់ស្លាកលេខភ្នំពេញ1AK-6406 តាម បណ្ដោយផ្លូវលេខ១០១៩ ក្នុងទិសដៅពីត្បូងទៅជើង ក៏ស្រាប់តែមានបុរស២នាក់ឈ្មោះ វ៉ាន់ និងឈ្មោះ ស្រស់ មានទីលំនៅក្បែរនាង បានជិះម៉ូតូមួយគ្រឿងឌុបគ្នាកៀរផ្ដួលម៉ូតូនាងបណ្ដាលឲ្យដួល គ្រោះថ្នាក់ទាំង៣នាក់ រួចជិះម៉ូតូគេចខ្លួនបាត់៕
ដោយ៖ ហេង នាង
