ម៉ូតូបុកម៉ូតូបណ្តាលឲ្យរងរបួសទាំងសងខាង
ភ្នំពេញ៖ កាលពីវេលាម៉ោង០៩និង១៥នាទីយប់ ថ្ងៃទី២៥ ធ្នូ បុរសអាណិកជន ដើមកំណើតខ្មែរម្នាក់ របួសជើង ចំណែកភាគីម្ខាងទៀត របួសបែកថ្ងាស ហូរឈាមដាបថ្នល់ ដែលឧបទ្ទវហេតុនេះ បង្កឡើងរវាងម៉ូតូ និងម៉ូតូនៅមុខ មុខសាលាភាសាកូរ៉េ ខាងត្បូងថ្នល់រថភ្លើងត្រឡោកបែក តាម បណ្ដោយផ្លូវលេខ៥៩៨ ស្ថិត ក្នុងកសង្កាត់ទឹកថ្លា ខណ្ឌសែនសុខ។
បុរសអាណិកជន ដើមកំណើតខ្មែរ បានប្រាប់ថា រូបគាត់មានឈ្មោះ ដូ អាយុ ២៨ឆ្នាំ សញ្ជាតិអាមេរិក ដើមកំណើតខ្មែរ ស្នាក់នៅរដ្ឋកាលីហ្វ័រនីញ៉ា ហើយបានមកលេងស្រុកខ្មែរ កាលពី៣ខែមុន។ ចំណែកភាគីម្ខាងទៀត ឈ្មោះ សុចិត្រា អាយុ ២០ឆ្នាំ ជានិសិត្យ។
សាក្សីនៅកន្លែងកើតហេតុ បាននិយាយថា មុនគ្រោះថ្នាក់នេះ គេឃើញបុរសអាណិកជនខ្មៃរ បើកបរម៉ូតូ ម៉ាកវ៉េវ ពណ៌ខ្មៅ ពាក់ស្លាក ភ្នំពេញ 1J- 4741 ពីត្បូងមកជើង ហើយមកដល់ផុតរបាំងថ្មចែកផ្លូវ ក៏បត់ត្រឡប់ក្រោយ ស្រាប់តែភាគីនិសិត្យ ដែលបើកម៉ូតូសេ ១២៥ ពណ៌ ខ្មៅ ពាក់ស្លាកលេខ ភ្នំពេញ 1BR- 9348 កំពុងបើកពីជើង ទៅត្បូង ក្នុងល្បឿនលឿន បានបុកពេញទំហឹង បណ្ដាលឲ្យអ្នកទាំង២ របួសធ្ងន់ដូចគ្នា។
ក្រោយកើតហេតុ ភាគីទាំង២ត្រូវនគរបាលផ្នែកចរាចរ ខណ្ឌសែនសុខ ហៅរថយន្ដដឹកយកទៅសង្គ្រោះ នៅគ្លីនិកឯក ចំណែក ម៉ូតូត្រូវបានដឹកយក ទៅអធិការដ្ឋានសែនសុខរងចាំការដោះស្រាយតាច្បាប់៕
ដោយ៖ ហេង នាង
