ក្រុមអ្នករត់ម៉ូតូឌុបនាំគ្នាព្រួតវាយយុវជន ២នាក់រងរបួសធ្ងន់
ភ្នំពេញ៖ កាលពីវេលាម៉ោង ១១យប់ថ្ងៃទី១៨ ធ្នូ នៅមុខសណ្ឋាគារណាហ្គាវើល តាមមហា វិថីព្រះសីហនុ ក្នុងសង្កាត់ទន្លេបាសាក់ ខណ្ឌចំការមន មានករណីក្រុមអ្នករត់រ៉ឺម៉កម៉ូតូ និងម៉ូតូឌុប ជាង ២០នាក់ បាននាំគ្នាព្រួតវាយយុវជន ២នាក់ រងរបួសធ្ងន់ ដោយមិនដឹងមូលហេតុពិតប្រាកដ ។
ប្រភពព័ត៌មានពីសន្តិសុខយាម នៅជិតកន្លែងកើតហេតុ បានឲ្យដឹងថា មុនពេលកើតហេតុ មិនដឹងជាមានរឿងអី ឬទំនាស់អ្វីគ្នា បានជាក្រុមអ្នករត់រ៉ឺម៉កម៉ូតូនិងអ្នករត់ម៉ូតូឌុបជាង២០នាក់ បាននាំព្រួតវាយយុវជន២ នាក់ ជិះម៉ូតូស្កុបពី ពណ៌ខ្មៅ បណ្តាលឲ្យរងរបួសធ្ងន់ទាំង ២នាក់ តែក្នុងនោះ ម្នាក់រត់គេចខ្លួនបាត់ នៅសល់តែម្នាក់ហើមមាត់ពោរ ទាល់តែសន្តិសុខយាមនៅជិតកន្លែងកើតហេតុ នាំគ្នាទៅជួយឃាត់ ទើបក្រុមអ្នករត់ម៉ូតូឌុប និងអ្នកបើករ៉ឺម៉កម៉ូតូនោះ នាំគ្នាឈប់វាយបំបែកគ្នារៀងខ្លួន ។
ទាក់ទិននឹងគ្នាច្រើនព្រួតវាយគ្នាតិចនេះ មិនដឹងជាគូភាគីទាំងពីរមានរឿងជម្លោះអ្វីគ្នាពីទីកន្លែងណាមកទេ គ្រាន់តែដឹងថា ខណៈមកដល់ចំណុចខាងលើស្រាប់តែនាំគ្នាព្រួតវាយយក តែម្តង ។ ជនរងគ្រោះនៅសល់ម្នាក់ នៅកន្លែងកើតហេតុ ត្រូវសមត្ថកិច្ចដឹកយកទៅព្យាបាលរបួស និងធ្វើការសាកសួរ ៕
ដោយ៖ ហេង នាង
