ស្រវឹងស្រាយកដុំថ្មគប់រយះជើងបុគ្គលិកស្រីម្នាក់ត្រូវសន្តិសុខវាយទ្រោមខ្លួន
ភ្នំពេញ៖ នៅវេលាម៉ោង១ និង៣០ នាទី រំលងអធ្រាត្រឈានចូលថ្ងៃទី១៤ ធ្នូ យុវជនម្នាក់ក្នុងចំណោម ៣នាក់ ត្រូវសន្តិសុខចាប់បាន ព្រួតវាយទ្រោមខ្លួន ដោយចោទប្រកាន់ថា ផឹកស៊ីស្រវឹង អុកឡុកនៅមុខក្លឹប និងយកដុំថ្មគប់ បុគ្គលិកស្រីម្នាក់ រងរបួស នៅតាមផ្លូវលេខ ២៧១ មុខក្លឹបវើរដាន់ ក្នុងសង្កាត់ទឹកល្អក់ទី៣ ខណ្ឌទួលគោក ។
ប្រភពព័ត៌មានជិតកន្លែងកើតហេតុ បានឲ្យដឹងថា មុនពេលកើតហេតុយុវជន៣ នាក់ ជិះម៉ូតូសង់កូរ៉េ ពណ៌ក្រហម ទៅចូលក្លឹបផឹកស៊ីរាំលេង រហូតដល់ម៉ោងខាងលើ ទើបនាំគ្នាចេញមកខាងក្រៅ មិនដឹងជាខឹងរឿងអី ពីខាងក្នុងក្លឹបមកទេ មកដល់មុខក្លឹប បានស្រែកឡូឡា ផ្អើលគេផ្អើលឯង រួចយកដុំថ្មគប់បណ្តាលឲ្យស្រ្តីម្នាក់ជាបុគ្គលិកក្នុងក្លឹបរយះ ជើងខាងស្តាំ ។
បន្ទាប់មក ស្រាប់តែឃើញសន្តិសុខ បាននាំគ្នាព្រួតដេញវាយជនបង្កទាំង ៣នាក់នោះវិញ តែ២ នាក់ រត់គេចខ្លូនបាត់ នៅសល់តែម្នាក់ ត្រូវសន្តិសុខព្រួតវាយទ្រោមខ្លួន ទើបទូរស័ព្ទហៅសាច់ញាតិមកទទួលយកត្រឡប់ទៅផ្ទះវិញ ។ ពេលដែលសាច់ញាតិជនរងគ្រោះ ហៅស្ត្រីរងរបួសនោះ មកសាកសួររួចហើយ ស្រ្តីនោះ ក៏មិនបានប្តឹងប្តល់ទេ ៕
ដោយ៖ ហេង នាង
