ពិភពលោកនឹងជជែកគ្នានៅអាម៉េរិកពីការបំបាត់ជំងឺរបេងជាសកល
ដោយ ឆាយសុផល
Cambodia News
ភ្នំពេញ (២០ កញ្ញា ២០១៨)៖ មេដឹកនាំ អ្នករៀបចំគោលនយោបាយ អ្នកជំនាញ និងអ្នកតស៊ូមតិឬសកម្មជនសុខភាពពិភពលោកនឹងជួបជុំគ្នានៅក្នុងបូរីញីវយ៉កនាសប្តាហ៍ក្រោយនេះ ដើម្បីពិភាក្សាគ្នាពីការប្រយុទ្ធបំបាត់ជំងឺរបេងនៅទូទាំងពិភពលោកក្នុងរយៈពេល១២ឆ្នាំខាងមុខ។
កិច្ចប្រជុំកម្រិតខ្ពស់លើកដំបូងរបស់អង្គការសហប្រជាជាតិស្តីពីជំងឺរបេងដែលត្រូវបានរៀបចំឡើងនៅទីស្នាក់ការអង្គការសហប្រជាជាតិនៅថ្ងៃទី២៣-២៧ កញ្ញា ឆ្នាំ២០១៨ នេះគឺមានបំណងទទូចឲ្យរដ្ឋជាសមាជិកអង្គការសហប្រជាជាតិមានឆន្ទៈនិងការប្តេជ្ញាចិត្តផ្នែកនយោបាយក្នុងការប្រយុទ្ធលុបបំបាត់ជំងឺរបេងនៅឆ្នាំ២០៣០។
ពិភពលោកកំពុងបារម្ពថា ជំងឺរបេងដែលសម្លាប់មនុស្សជាង៤.០០០នាក់ក្នុងមួយថ្ងៃជុំវិញពិភពលោកនោះគឺត្រូវការដោយស្រាយឲ្យបានសមស្រប ប់មិនដូច្នោះទេ វានឹងសម្លាប់មនុស្សកាន់តែច្រើន ពិសេសអ្នករស់នៅជាមួយមេរោគអេដស៍។ ជំងឺនេះងាយចាប់យកដោយមនុស្សមិរើសមុខ និងគ្រប់កន្លែង តាមរយៈខ្យល់អាកាសនៅក្នុងគ្រួសារ ក្នុងសហគមន៍ និងក្នុងសង្គមទាំងមូល។
បើតាមអង្គការសុខភាពពិភពលោកបានឲ្យដឹងថា របេងនៅតែជាឃាតករមួយក្នុងចំណោមជំងឺទាំង១០ក្នុងពិភពលោក ហើយរោគសញ្ញាណនៃរបេងរួមមាន ការឈឺទ្រូង គ្រុន បែកញើសពេលយប់ និងស្រកទំងន់ជាដើម ដែលត្រូវការការព្យបាលមានគុណភាព ដើម្បីចៀសវាងការឈឺចាប់និងការស្លាប់។
ជនជាតិកម្ពុជាបីរូប មួយរូបជាមន្រ្តីអង្គការសង្គមស៊ីវីល មួយរូបជាសកម្មជនក្នុងបណ្តាញសង្គម និងមួយរូបជាអ្នកសារព័ត៌មានត្រូវការិយាល័យអង្គការសហប្រជាជាតិទទួលបន្ទុកសេវាគម្រោងហៅកាត់ថា UNOPS ឲ្យចូលរួមក្នុងកិច្ចប្រជុំនេះ និងកិច្ចប្រជុំពាក់ព័ន្ធផ្សេងៗទៀត។
សម្រាប់កម្ពុជា បើទោះជាអត្រានៃការស្លាប់ដោយសាររបេងបានធ្លាក់ចុះក៏ដោយ ក៏មានករណីមួយភាគបីមិនត្រូវបានគេដឹង ហើយប្រទេសនេះត្រូវការការខិតខំ ការប្តេជ្ញាចិត្ត ការវិនិយោគ និងធនធាន នៅក្នុងការស្រាវជ្រាវ ព្យាបាល និងការការបង្ការកាន់តែសកម្មឡើង ដូចនេះខ្លួនអាចចូលរួមជាមួយអង្គការសហប្រជាជាតិដើម្បីពិភពលោកគ្មានជំងឺរបេងនៅឆ្នាំ២០៣០។
សូមបញ្ជាក់ថា ជំងឺដែលសម្លាប់មនុស្សទាំង៩ទៀតរួមមាន ជំងឺខ្សោយបេះដូង ជំងឺដាច់សរសៃឈាមខួរក្បាល ជំងឺរលាកទងដង្ហើម ជំងឺស្ទះផ្លូវដង្ហើមរ៉ាំរ៉ៃ ជំងឺមហារីកសួត ជំងឺទឹកនោមផ្អែម ជំងឺវង្វេងស្មារតីនិងដាច់ប្រព័ន្ធខួរក្បាល ជំងឺរាគរួសខ្វះជាតិទឹក និងជំងឺក្រិនថ្លើម នេះបើតាមរបាយការណ៍របស់អង្គការសុខភាពពិភពលោក៕
