អ្នកសារព័ត៌មានជាតិ និងអន្តរជាតិ ដែលស្លាប់ក្នុងសម័យសង្គ្រាមនៅកម្ពុជាមានចំនួនច្រើន
ភ្នំពេញ៖ នៅក្នុងការចុះពិនិត្យមើលស្ដូបរម្លឹក វិញ្ញាណក្ខន្ធអ្នកសារព័ត៌មានជាតិ និងអន្តរ ជាតិ ដែលបានស្លាប់ និងបាត់ខ្លួន ក្នុងសម័យសង្គ្រាមនៅកម្ពុជា កាលពីរសៀល ថ្ងៃទី១០ ធ្នូ ២០១២ នៅមុខសណ្ឋាគារ ឡឺរ៉ូយ៉ាល់ ឯកឧត្តម ខៀវ កាញារិទ្ធ រដ្ឋមន្ត្រីក្រសួង ព័ត៌មាន បានថ្លែងថា សង្គ្រាមនៅប្រទេសកម្ពុជា ក្នុងអំឡុងពេលពី ឆ្នាំ១៩៧០ ដល់ឆ្នាំ១៩៧៥ បាន ធ្វើឲ្យអ្នកកាសែតស្លាប់ច្រើនជាងសង្គ្រាមនៅក្នុងប្រទេសវៀតណាម ដែលមានរយៈ ពេល រហូតដល់ ១០ ឆ្នាំ។
ឯកឧត្តម បន្តថា ការរៀបចំស្ដូបនេះឡើង គឺដើម្បីដាក់រូបថតអ្នកកាសែត ដែលបានបាត់ខ្លួន និងស្លាប់ក្នុងសម័យសង្គ្រាម ពីឆ្នាំ១៩៧០ ដល់ ឆ្នាំ១៩៧៥ និងទុកជាកន្លែងសម្រាប់ការគោរពចំពោះអ្នកកាសែតទាំងអស់ ដែលបានបំពេញការងាររបស់ខ្លួន ដើម្បីសេរីភាព នៃការបញ្ចេញមតិ សេរីភាព នៃការផ្ដល់ព័ត៌មាន ក៏ដូចជាការគោរពចំពោះអ្នកកាសែតដែលបានបូជាជីវិតរបស់ខ្លួន ដើម្បីផ្ដល់ព័ត៌មានជូនដល់ប្រជាពលរដ្ឋ។
លោករដ្ឋមន្ត្រី បានបញ្ជាក់ថា ការសង់ស្ដូបនៅមុខសួនច្បារ ក្បែរសណ្ឋាគារ ឡឺរ៉ូយ៉ាល់ នេះ គឺជាទីតាំងចុងក្រោយរបស់អ្នកកាសែតបរទេសទាំងអស់ ដែលបានស្នាក់នៅ និងធ្វើការងារនៅក្បែរក្រសួងឃោសនាការ និងព័ត៌មាន ដើម្បីបញ្ចូនសារទូរលេខផ្សេងៗ នោះ ហើយការដាក់រូបថតនេះ ក៏ដើម្បីឲ្យក្រុមគ្រួសាររបស់ជនរងគ្រោះមកគោរពបូជាផងដែរ។
ការរៀបចំឲ្យមានជាស្តូបនេះ ក៏ដើម្បីផ្ដល់នូវតម្លៃគំរូវីរភាពដល់អ្នកសារព័ត៌មាន ដែលពួកគាត់មានសេចក្ដីក្លាហានក្នុងបុព្វហេតុផ្ដិតយករូបភាពពិតៗ នៅក្នុងសម័យសង្គ្រាម ហើយនេះ វាជាលើកទី១ ហើយ នៅក្នុងប្រវត្តិសាស្ត្រប្រទេសកម្ពុជា ដែលបានសាងសង់ស្ដូបនេះឡើង ដើម្បីសម្ដែងទៅដល់បងប្អូនអ្នកកាសែត ដែលបានស្លាប់ក្នុងការប្រកបវិជ្ជាជីវៈសារព័ត៌មាននៅប្រទេសកម្ពុជា ក្នុងអំឡុងសម័យសង្គ្រាមលន់ណុល និងសម័យខ្មែរក្រហម។
គួរបញ្ជាក់ថា អ្នកសារព័ត៌មានជាតិ និងអន្តរជាតិ ដែលបានស្លាប់ និងបាត់ខ្លួន ក្នុងសម័យសង្គ្រាមនៅកម្ពុជា ក្នុងអំឡុងឆ្នាំ១៩៧០ ដល់ ឆ្នាំ១៩៧៥ សរុបទាំងអស់មានចំនួន ៣៧ រូប ក្នុងនោះ មានទាំងអ្នកថតរូប និងអ្នកយកព័ត៌មានជនជាតិជប៉ុន ជនជាតិបារាំង និងជនជាតិកម្ពុជា ដែលបានរកឃើញស្លាប់ក្នុងប្រទេសកម្ពុជា៕
ដោយ៖ ហេង នាង
