គំនិតខ្លះទាក់ទិននិងការចូលរួមក្នុងការកាត់បន្ថយអំពើហិង្សាក្នុងគ្រួសារ
បទសម្ភាសន៍
តើអ្នកបានត្រៀមអ្វីខ្លះសម្រាប់ការចូលរួមក្នុងការកាត់បន្ថយអំពើហិង្សាក្នុងគ្រួសារ?
ដោយ បូ សកលកិត្យា
ដើម្បីបានដឹងពីផ្នត់គំនិតខ្លះរបស់មនុស្សនាសម័យថ្មីស្តីពីការទប់ស្កាត់អំពើហិង្សាក្នុងគ្រួសារ អ្នកយកព័ត៌មានយើងបានជួបសម្ភាសន៍ជាមួយពលរដ្ឋមួយចំនួន ដែលបទសម្ភាសន៍នោះមានដូចខាងក្រោម៖
កញ្ញា ហាក់ ស្រីនិត អាយុ ១៨ ឆ្នាំ និសិត្សនៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍
”ដោយសារតែខ្ញុំជានិសិត្សនៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ ដែលក្នុងនោះរួមមានទាំងជំនាញសារពត៌មាន ដូចនេះអ្វីដែលខ្ញុំធ្វើបានគឺចែកចាយពត៌មាន និង ចំនេះដឹងតាមរយៈការសរសេរអត្ថបទដែលទាក់ទងនិងអំពើហឹង្សានេះ ។ ខ្ញុំក៏នឹងចូលរួមរាល់សកម្មភាពក្នុងការចុះអប់រំប្រជាជននៅតាមសហគមន៍ ភូមិ ឃុំ ពីអំពើហិង្សាក្នុងគ្រួសារនេះផងដែរ”។
លោក ឆន សុវណ្ណារ៉ា អាយុ ២៤ ឆ្នាំ ជាផលិតករភាពយន្ត
“ការថតកុនជាការងាររបស់ខ្ញុំ ដូចនេះខ្ញុំមានគោលបំណងផលិតភាពយន្តមួយដែលផ្ញើរសារដល់ប្រជាជនទូទៅទាក់ទងនិងអំពើហិង្សាក្នុងគ្រួសារនេះ។ ខ្ញុំបានយល់ពីផលវិបាកនៅពេលដែលមានអំពើហិង្សាក្នុងគ្រួសារ វានិងប៉ះពាល់ដល់សង្គមដល់សមាជិកគ្រួសារ ជាពិសេសទៅនោះគឺប៉ះពាល់ដល់កុមារដែរជាទំពាំងស្នងឬស្សីរបស់ប្រទេសជាតិ នោះខ្ញុំនិងខិតខំធ្វើអោយប្រជាជនយល់កាន់តែច្បាស់ពីអំពើហឹង្សាក្នុងគ្រួសារនេះតាមរយះការបង្ហាញខ្សែភាពយន្ត” ។
កញ្ញា កែវ គូនីឡា បុគ្គលិកអង្គការក្រៅរដ្ឋាភិបាល
“ខ្ញុំអាចនិយាយបានថា ខ្ញុំអាចជួយក្នុងការកាត់បន្ថយអំពើហឹង្សាក្នុងគ្រួសារតាមរយៈការធ្វើជាមនុស្សដែរមិនប្រព្រឹត្តអំពើហឹង្សា។ ប្រសិនបើយើងអាចស្វែងយល់ពីអ្នកដ៏ទៃបាន នោះយើងនិងស្វែងយល់ពីពិភពលោកខាងក្រៅបានដូចគ្នា។ យើងគួរតែធ្វើអំពើ ដែរយើងចង់អោយគេធ្វើមកលើយើង ។ ការយោគយល់ពីគ្នា ជាកត្តាដ៏សំខាន់បំផុត ព្រោះបើគ្មានកត្តានេះទេវានិង បង្កអោយមាន ជំលោះ និង អំពើហឹង្សា ។ ដូចនេះ អ្វីដែរសំខាន់គឺការយោគយល់គ្នា មិនថារវាង ប្តី ប្រពន្ឋ បង ប្អូន រឺ ក៏ម្តាយ ឪពុកឡើយ ”។
លោក ប៊ុន សេងគង់ អាយុ ២០ ឆ្នាំ ជានិសិត្សនៃសកលវិទ្យាល័យកម្ពុជា
“ការអត់ធ្មត់ ការបើកចិត្តអោយទូលាយ និង ការស្តាប់ហេតុផលជាកត្តាដែរជៀសវៀងអំពើហឹង្សាក្នុងគ្រួសារ ។ ខ្ញុំនិងព្យាយាមអប់រំអ្នកដទៃ បើទោះជាខ្ញុំគ្មានសមត្ថភាព ឬថវិកាគ្រប់គ្រាន់ក៏ដោយ ។ វាមិនមានន័យថាទាល់តែមានសមត្ថភាព រឺ ថវិកាគ្រប់គ្រាន់ទើបអាចអប់រំអ្នកដ៏ទៃបានទេ ។ អ្នកអប់រំអ្នកដ៏ទៃបានគ្រប់ពេលវេលា និងគ្រប់ទីកន្លែង។ អ្វីដែលខ្ញុំចង់អោយគេដឹងច្បាស់នោះគឺសិទ្ធិរបស់ស្ត្រី និងស្ត្រីគួរតែដឹងច្បាស់ពីសិទ្ធិរបស់ខ្លួន “។
កញ្ញា អ៊ុំ ច័ន្ទទេវី អាយុ ២២ឆ្នាំ អ្នកគ្រប់គ្រងទូទៅនៅវិទ្យុមួយ
“សំរាប់ការចូលរួមរបស់ខ្ញុំ គឺត្រូវផ្តើមពីខ្លួនឯង ឲ្យស្គាល់ពីអ្វីហៅថា អំពើហិង្សា សិន ឲ្យយល់ថា កំហឹងកំរឹតណាដែលឈានដល់ការប្រើហិង្សា។ សំខាន់ តើយើងចេះប្រើអារម្មណ៍ និងនិយាយ ប៉ុណ្ណាដើម្បីកុំឲ្យឈានដល់ការប្រើហិង្សា។ ហិង្សាមិនមែនកើតឡើង សម្រាប់តែប្តី ប្រពន្ធនោះទេ តែវាអាចកើតមានចំពោះសមាជិកគ្រប់គ្នាក្នុងគ្រួសារ។ ដូចនេះ ការដែលមានហេតុផលក្នុងការនិយាយគ្នាគឺល្អបំផុត។ ចាប់ផ្តើមពីខ្លួនឯង ក្នុងគ្រួសារ មិនឲ្យមានហិង្សា ក៏មិនប្រើហិង្សាដាក់គេ”។