រថយន្តដឹកទឹកបរិសុទ្ធបើកបុកលោកយាយម្នាក់ដើរឆ្លងផ្លូវបណ្តាលឲ្យដួលបោកក្បាលពីក្រោយរងរបួសធ្ងន់
ភ្នំពេញ ៖ កាលពីវេលាម៉ោង៥ និង២៥ នាទីទៀបភ្លឺ ថ្ងៃទី២១ វិច្ឆិកា ២០១២ នៅលើផ្លូវលេខ២៧១ ទល់មុខមន្ទីរពេទ្យព្រះកុសុមៈ ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ លោកយាយម្នាក់ ត្រូវរថយន្តដឹកទឹកបរិសុទ្ធមួយគ្រឿង បុកបណ្តាលឲ្យដួលបោកក្បាលពីក្រោយរងរបួសធ្ងន់ ខណៈពេលដើរឆ្លងផ្លូវទៅសុំសីលវត្ត នៅក្នុងមន្ទីរពេទ្យព្រះកុសុមៈ។
ប្រភពព័ត៌មានពីសាច់ញាតិលោកយាយរងគ្រោះ បានឲ្យដឹងថា លោកយាយមានឈ្មោះ ប៊ុន ណារ័ត្ន អាយុ ៧៣ឆ្នាំ ស្នាក់នៅភូមិកើតហេតុខាងលើ ដោយសារថៃ្ងនេះជាថ្ងៃពេញបូរមី លោកយាយតែងតែទៅសុំសីលវត្ត ក្នុងមន្ទីរពេទ្យព្រះកុសុមៈ ។
មុនពេលកើតហេតុ គាត់បានដើរឆ្លងផ្លូវ២៧១ ពីលិចទៅកើត ក្នុងគោលបំណងទៅសុំសីលនៅវត្ត ដែលមានទីតាំង នៅក្នុងមន្ទីរពេទ្យព្រះកុសុមៈ ស្រាប់តែមានរថយន្តដឹកទឹកបរិសុទ្ធ ពណ៌ខៀវ បើកបរពីជើងទៅត្បូង បានបើកទៅបុកស្រ្តីរូបនោះ កំពុងដើរឆ្លងផ្លូវ បណ្តាលឲ្យដួលបោកក្បាលពីក្រោយ រងរបួសធ្ងន់ ។ ចំណែករថយន្តបង្ក ព្យាយាមបន្ថែមល្បឿនឆ្ពោះទៅទិសខាងត្បូង៕
ដោយ៖ ហេង នាង
