៦នាក់របួសធ្ងន់ ដោយសារការបាញ់ពីអ្នកការពារក្រុមហ៊ុនឧកញ៉ា ណា ម៉ារ៉ាឌី
មានសេចក្ដីរាយការណ៍មួយពីខេត្តក្រចេះមកថា ទាហានការពារក្រុមហ៊ុនអភិវឌ្ឍន៍ដំណាំកៅស៊ូ ឈ្មោះ ធីធីវ៉ាយ (TTY) របស់លោកឧកញ៉ា ណា ម៉ារ៉ាឌី បានបាញ់ទៅលើពលរដ្ឋ ៦ នាក់ នៅឃុំ ២ធ្នូ ស្រុកស្នួលនៅថ្ងៃទី ១៨ ខែមករា ឆ្នាំ ២០១២។
អ្នករាយការណ៍ព័ត៌មាន rfa ប្រចាំខេត្តក្រចេះបានអះអាងថា ការបាញ់ណេះដោយសារតែរឿងជម្លោះដីធ្លី ហើយពលរដ្ឋទាំង ៦ នាក់នោះបានរងរបួសធ្ងន់។
សេចក្ដីរាយការណ៍បានបន្តថា អំពើហិង្សានេះកើតឡើងបន្ទាប់ប្រជាពលរដ្ឋបានជួបប្រជុំគ្នាតវ៉ា ប្រឆាំងនឹងគ្រឿងចក្ររបស់ក្រុមហ៊ុន ដែលបានឈូសឆាយប៉ះពាល់លើដីចម្ការរបស់ពួកគាត់។
បច្ចុប្បន្នប្រជាពលរដ្ឋបានបិទផ្លូវជាតិលេខ ៧៦អា ពីស្រុកស្នួល ខេត្តក្រចេះ ទៅស្រុកកែវសីមា ខេត្តមណ្ឌលគិរី ដើម្បីស្នើឲ្យមានកិច្ចអន្តរាគមន៍ និងជួយរកដំណោះស្រាយជូនពួកគាត់។ ប្រជាពលរដ្ឋបានអះអាងថា ពួកគាត់នឹងបន្តបិទផ្លូវនេះ រហូតដល់មានដំណោះស្រាយពីរដ្ឋាភិបាល ហើយពលរដ្ឋក៏បានសំណូមពរដល់លោកនាយករដ្ឋមន្ត្រី ហ៊ុន សែន ជួយដោះស្រាយជម្លោះនេះឲ្យបានឆាប់។
មិនទាន់មានការបំភ្លឺណាមួយពីលោកឧកញ៉ា ណា ម៉ារ៉ាឌី និងអ្នកតំណាងក្រុមហ៊ុនអភិវឌ្ឍន៍ដំណាំកៅស៊ូ ធីធីវ៉ាយ នោះឡើយទេ៕
