ក្រោយព្យុះSandy ប្រជាជនញូវយ៉កកំពុងប្រឈមនឹងអាកាសធាតុចុះត្រជាក់
នៅមួយសប្តាហ៍ក្រោយព្យុះសង្ឃរាSandy បោកបក់បំផ្លាញ ទីក្រុងពាណិ ជ្ជកម្មញូវយ៉កចាប់ផ្តើមងើបស្តាខ្លួនឡើងវិញ។ ប៉ុន្តែ ទីក្រុងញូវយ៉កដែលខូច ខាតធ្ងន់ធ្ងរដោយសារខ្យល់ព្យុះSandy កំពុងប្រឈមនឹងបញ្ហាគ្មានអគ្គិ សនីប្រើប្រាស់ មនុស្សគ្មានសម្បែង ក្នុងពេលសីតុណ្ហភាពចាប់ផ្តើមចុះត្រជាក់ តាំងពីថ្ងៃអាទិត្យ ទី ៤ វិច្ឆិកា២០១២។
គ្រោះកាចនៅមិនទាន់ចប់ទេសម្រាប់ប្រជាជនអាមេរិក។ នៅទីក្រុងញូវយ៉ក អាកាស ធាតុចុះត្រជាក់ខ្លាំង ចាប់ពីថ្ងៃចន្ទនេះ គឺអាចដល់ ដក១អង្សារសេ បានជំរុញឲ្យ អាជ្ញាធរអាមេរិកទាញសញ្ញាប្រកាសអាសន្ន។ នោះ គឺគេត្រូវរកជំរកកក់ក្តៅ ជាបន្ទាន់សម្រាប់ប្រជាជនដែលមានផ្ទះសម្បែងរបស់ខ្លួនត្រូវវាយបំផ្លាញដោយ ខ្យល់ព្យុះ។ ប្រជាជនញូវយ៉កទាំងនោះដែលមានចំនួន ប្រមាណពី៣ទៅ៤ម៉ឺននាក់ កំពុងរស់នៅក្នុងជម្រកបណ្តោះអាសន្នរបស់សាលាក្រុង។ ចំណែកផ្ទះជាង ១សែនខ្នង គ្មានភ្លើងអគ្គិសនីប្រើប្រាស់។
ព្យុះSandyដែលបក់បោកឆ្នេរខាងកើតអាមេរិកកាលពីថ្ងៃចន្ទ(២៩តុលា)សប្តាហ៍ មុនបានធ្វើឲ្យផ្ទះសម្បែងជាង២លានខ្នងក្នុងរដ្ឋចំនួន៧គ្មានភ្លើង ប្រើប្រាស់។ គ្មានភ្លើងអគ្គិសនីប្រើប្រាស់គ្មានភ្លើងកំដៅ ក្នុងពេលដែលមន្រ្តីឧតុនិយម បានព្យាករថា នឹងមានព្យុះថ្មីមួយទៀតនឹងវាយបក់ទៅលើទីក្រុងញូវយ៉កនៅ ថ្ងៃពុធខានស្អែក ដោយនាំមកជាមួយព្យុះភ្លៀង។
កាលពីថ្ងៃម្សិលមិញ អភិបាលរដ្ឋញូវយ៉ក លោក Andrew Cuomo បានអំពាវនាវ ឲ្យប្រជាជនដែលគ្មានភ្លើងអគ្គិសនីប្រើប្រាស់នោះ ចាកចេញពីផ្ទះរបស់ខ្លួន។ ក្នុងពេលនេះ គេត្រូវរង់ចាំរយៈពេលយ៉ាងតិច២សប្តាហ៍ទៀតទម្រាំគេអាចត បណ្តាញអគ្គិសនីឡើងវិញ។សម្រាប់អភិបាលរដ្ឋញូវយ៉កប្រជាជននឹងអាចជួបគ្រោះ ថ្នាក់ ភ្លើងឆេះផ្ទះ ឬស្លាប់ដោយភាពត្រជាក់ ប្រសិនបើពួកគេនៅបន្តរស់នៅ ក្នុងផ្ទះដែលគ្មានភ្លើងអគ្គិសនី និងប្រើប្រាស់តែភ្លើងទៀន។
សូមរំលឹកថា ខ្យល់ព្យុះកំណាចSandyកាលពី ថ្ងៃទី ២៩ តុលា កន្លងទៅបាន សម្លាប់ជីវិតពលរដ្ឋអាមេរិកាំង ១០៦នាក់ ដែលមាន៤០នាក់ នៅក្នុងទីក្រុងញូវ យ៉ក។គេបានវាយតម្លៃថា ខ្យល់ព្យុះSandyបានធ្វើឲ្យអាមេរិកខាតបង់ប្រាក់ពី ២០ ទៅ ៤០ពាន់លានដុល្លារ៕ដោយ ឈាង បុប្ផា (RFI)
