ការប្រកួតជំនាញពិភពលោកលើកទី ៤៨ បើកធ្វើនៅទីក្រុងសៀងហៃក្រោមអធិបតីភាពរបស់លោក Li Qiang នាយករដ្ឋមន្ត្រីចិន
Cambodia News
កាលពីយប់ថ្ងៃទី ២២ ខែកញ្ញា ការប្រកួតជំនាញពិភពលោកលើកទី ៤៨ បានបើកធ្វើនៅទីក្រុងសៀងហៃក្រោមអធិបតីភាពរបស់លោក Li Qiang នាយករដ្ឋមន្ត្រីចិន ។
ក្នុងពិធីបើក លោក Li Qiang បានអានលិខិតអបអរសាទររបស់លោក Xi Jinping ប្រធានរដ្ឋចិន និងប្រកាសបើកការប្រកួតជាផ្លូវការ។
នៅមុនពិធីបើក ក្រុមយុវជនទីក្រុងសៀងហៃបានសម្តែងសិល្បៈដើម្បីស្វាគមន៍យ៉ាងកក់ក្តៅចំពោះភ្ញៀវកិត្តិយសដែលមកពីទីជិតឆ្ងាយ ខណៈដែលយុវជនមានជំនាញចំនួន ៥ នាក់ដែលមកពីទ្វីបទាំង ៥ បានចែករំលែកបទពិសោធជីវិតពិតអំពីការសម្រេចក្តីសុបិនតាមរយៈការរៀនជំនាញរបស់ខ្លួន។
លោក Anwar Ibrahim នាយករដ្ឋមន្ត្រីម៉ាឡេស៊ី បានអញ្ជើញចូលរួមពិធីបើក។ ក្រៅពីនេះ ក៏មានការចូលរួមពីអ្នកទទួលខុសត្រូវនៃស្ថាប័នពាក់ព័ន្ធមកពីប្រទេស និងតំបន់នានា និងអង្គការអន្តរជាតិផងដែរ។
សូមរម្លឹកថា ការប្រកួតលើកនេះមានវិញ្ញាសាប្រកួតចំនួន ៦៤ ដោយមានបេក្ខជនចំនួន ១៣៨៥ នាក់មកពីប្រទេស និងតំបន់ចំនួន ៦៨ ។ ការប្រកួតនឹងបិទបញ្ចប់នៅថ្ងៃទី ២៧ ខែកញ្ញានេះ៕
