លោក Li Qiangនាយករដ្ឋមន្ត្រីចិនចូលរួមកិច្ចប្រជុំកំពូលស្តីពីកិច្ចសហប្រតិបត្តិការសេដ្ឋកិច្ចនៃមហាអនុតំបន់ទន្លេមេគង្គលើកទី៨

Cambodia News/

ថ្ងៃទី៧ខែវិច្ឆិកា លោកLi Qiangនាយករដ្ឋមន្ត្រីចិនបានចូលរួមកិច្ចប្រជុំកំពូលស្តីពីកិច្ចសហប្រតិបត្តិការសេដ្ឋកិច្ចនៃមហាអនុតំបន់ទន្លេមេគង្គលើកទី៨នៅទីក្រុងKunming និងមានការចូលរួមពីប្រមុខរដ្ឋាភិបាលនៃប្រទេសកម្ពុជា ឡាវ មីយ៉ាន់ម៉ា ថៃនិងវៀតណាមនិងប្រធានធនាគារអភិវឌ្ឍន៍អាស៊ី។

លោកLi Qiangបានលើកឡើងថា ពិភពលោកបច្ចុប្បន្នបានឈានចូលសម័យកាលថ្មីនៃបម្រែបម្រួលនិងភាពរង្គោះរង្គើ ប្រទេសចិននិងបណ្តាប្រទេសទន្លេមេគង្គគឺជាសហគមន៍រួមវាសនាដ៏ស្អិតល្មួតដូចគ្រួសារតែមួយ គួររួបរួមនិងសហការគ្នាយ៉ាងជិតស្និទ្ធ បំពេញបន្ថែមគ្នាខាងឧត្តមភាពផ្នែកសេដ្ឋកិច្ច ធ្វើឱ្យកាន់តែស៊ីជម្រៅថែមទៀតនូវកិច្ចសហប្រតិបត្តិការជាក់ស្តែងលើគ្រប់វិស័យនិងរួមចំណែកជាវិជ្ជមានដល់សន្តិភាព សន្តិសុខ ការអភិវឌ្ឍនិងវិបុលភាពក្នុងតំបន់និងពិភពលោក។

លោកLi Qiangបានលើកឡើងសំណើ៤ចំណុចស្តីពីការធ្វើឱ្យស៊ីជម្រៅនូវកិច្ចសហប្រតិបត្តិការក្នុងតំបន់៖ទីមួយ ប្រកាន់ខ្ជាប់នូវការបើកចំហនិងកិច្ចសហប្រតិបត្តិការ និងរួមគ្នាជំរុញការបើកចំហទៅវិញទៅមកប្រកបដោយកម្រិតកាន់តែខ្ពស់និងទ្រង់ទ្រាយកាន់តែធំ។ ទីពីរ រំលេចពីតួនាទីណែនាំការច្នៃប្រឌិតថ្មី គាំទ្រនិងធានាឱ្យកិច្ចសហប្រតិបត្តិការផ្នែកច្នៃប្រឌិតថ្មីមានភាពកាន់តែស៊ីជម្រៅនិងរឹងមាំជាបន្តបន្ទាប់។ទី៣ ធ្វើឱ្យកាន់តែស៊ីជម្រៅនូវការកសាងការរួមបញ្ចូលគ្នានិងការតភ្ជាប់គ្នា និងពន្លឿនដំណើរការសមាហរណកម្មសេដ្ឋកិច្ចក្នុងតំបន់។ទីបួន ធ្វើឱ្យកាន់តែជិតស្និតនូវការប្រាស្រ័យទាក់ទងនិងសហការគ្នា និងបង្កបរិយាកាសសហប្រតិបត្តិការដ៏ល្អប្រសើរដែលប្រកបដោយបរិយាបន្ននិងជំរុញគ្នាទៅវិញទៅមក។

គួរបញ្ជាក់ថា កិច្ចប្រជុំបានអនុម័តឯកសារសមិទ្ធផលដូចជា《សេចក្តីប្រកាសនៃកិច្ចប្រជុំកំពូលស្តីពីកិច្ចសហប្រតិបត្តិការសេដ្ឋកិច្ចនៃមហាអនុតំបន់មេគង្គលើកទី៨》និង《យុទ្ធសាស្ត្រអភិវឌ្ឍន៍ប្រកបដោយភាពច្នៃប្រឌិតថ្មីឆ្នាំ២០៣០ នៃកិច្ចសហប្រតិបត្តិការសេដ្ឋកិច្ចនៃមហាអនុតំបន់ទន្លេមេគង្គ》ជាដើម៕