ការបោះឆ្នោតឆ្នាំ២០១៣ត្រូវចំណាយអស់ជាង២០លានដុល្លារសហរដ្ឋអាមេរិក
Cambodia News
ដោយ៖ ហេង នាង
ភ្នំពេញ៖ នីព្រឹកថ្ងៃទី១១ កញ្ញា ២០១២ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) បាន ឲ្យដឹងថា ថវិកាសម្រាប់បម្រើដល់ការបោះឆ្នោតឆ្នាំ២០១៣ ដែលមានទាំងការពិនិត្យបញ្ជី និងចុះឈ្មោះបោះឆ្នោតមានចំនួន ជាង២០លានដុល្លារសហរដ្ឋអាមេរិក។
តាមចំនួនប្រជាពលរដ្ឋប៉ាន់ស្មានដែលត្រូវបោះឆ្នោត គ.ជ.ប ត្រូវចំណាយក្នុងម្នាក់ចំនួន ២,១៤ដុល្លារអាមេរិក ហើយបើប្រៀប ធៀបការពិនិត្យ និងចុះឈ្មោះបោះឆ្នោតឆ្នាំនេះ នឹងឆ្នាំ២០១១កន្លងទៅ នៅឆ្នាំនេះ ត្រូវចំណាយលើសប្រហែលជិត ១លាន ដុល្លារអាមេរិក។
គួរបញ្ជាក់ថា ការពិនិត្យបញ្ជីឈ្មោះ និងចុះឈ្មោះបោះឆ្នោតមានរយៈពេល ៤២ថ្ងៃ ដោយចាប់ពីផ្ដើមពីថ្ងៃទី១ កញ្ញា ដល់ថ្ងៃទី១២ តុលា ២០១២។ ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ គឺដើម្បីជ្រើសរើសតំណាងរាស្ដ្រនីតិកាលទី៥ នៅថ្ងៃទី ២៨ កក្កដា ២០១៣ខាងមុខនេះ៕
