ក្លិបអ្នកកាសែតកម្ពុជា ចាប់ដៃជាមួយសមាគមអ្នកសារព័ត៌មានទូទាំងប្រទេស របស់មហាយក្សចិន

Cambodia News/

ភ្នំពេញ ៖ ក្លិបអ្នកកាសែតកម្ពុជាបានចាប់ដៃ​​​ជាមួយសមាគមអ្នកសារព័ត៌មាន​​​នៃប្រទេសមហាយក្សមួយទៀតហើយ​​​​នៅថ្ងៃសុក្រនេះ ​​​​បន្ទាប់ពីក្លិបអ្នកកាសែតកម្ពុជាបានចាប់ដៃគូជាមួយសមាគម​​​​អ្នកសារព័ត៌មានបរទេស​​​ជាបន្តបន្ទាប់​​​នៅក្នុង​​​តំបន់អាស៊ាន។

លោក ពុយ គា ប្រធានក្លិបអ្នកកាសែតកម្ពុជាត្រូវបានអញ្ជើញទៅប្រទេសចិនដើម្បីជួបពិភាក្សាការងារលើកទីមួយជាមួយ លោកជំទាវ អ៊ូ សៀ សមាជិកក្រុមបក្សកុម្មុយនីស្តចិននិងជាលេខាធិការ​​​នៃលេខាធិការដ្ឋានសមាគមអ្នកសារព័ត៌មានទូទាំង​​​ប្រទេសចិន​​​ក្នុងគោលបំណងដើម្បីភ្ជាប់ទំនាក់ទំនងរវាងសមាគមនៃប្រទេសទាំងពីរ។

នៅឯជំនួបព្រឹកថ្ងៃទី៧ ខែមិថុនា នៅទីក្រុងគុនមីង ខេត្តយូណាននៃប្រទេសចិន លោកជំទាវ អ៊ូ សៀ បានថ្លែងថា​​​សមាគមអ្នក​​​សារព័ត៌មានទូទាំងប្រទេសចិនធ្វើការជាមួយអ្នកសារព័ត៌មាន១លាន២សែននាក់នៅប្រទេសចិន រីករាយនឹងភ្ជាប់ទំនាក់​​ទំនង​​ជាមួយក្លិបអ្ន​កកាសែតកម្ពុជាដើម្បីធ្វើការរួមគ្នាលើវិស័យសារព័ត៌មាន។

លោក ពុយ គា បានជម្រាបជូនភាគីចិនថាក្លិបអ្នកកាសែតកម្ពុជាមានបំណង​​​ធ្វើការជាមួយអ្នកសារព័ត៌មានចិន​​​តាមរយៈសមាគម​​​អ្នកសារព័ត៌មានទូទាំងប្រទេសចិនដើម្បីផ្សព្វផ្សាយព័ត៌មានល្អៗដែលអាចជួយជំរុញដល់កំណើនទេសចរណ៍និងទុនវិនិយោគនៅកម្ពុជា ជួយទប់ស្តាត់និងកាត់បន្ថយព័ត៌មានដែលនាំឱ្យមានការភាន់ច្រឡំ ក៏ដូចជាខ្សែភាពយន្ត “No More Bets” ដែលបានចាក់​​​បញ្ចាំងកន្លងមក។

ភ្លាមៗនោះ លោកជំទាវបានជម្រាបលោក ពុយ គា ថាលោកស្រី នឹងដឹកនាំប្រតិភូអ្នកសារព័ត៌មានទូទាំងប្រទេសចិន​​​ទៅកាន់កម្ពុជានៅពេលឆាប់ៗខាងមុខនេះដើម្បីចុះហត្ថលេខាភ្ជាប់ទំនាក់ទំនងជាផ្លូវការជាមួយក្លិបអ្នកកាសែតកម្ពុជាតែម្តង។

ក្លិបអ្នកកាសែតកម្ពុជាមានសមាជិកជាង៦០០នាក់ មកពីជិត២០០ស្ថាប័ន បានក្លាយជាសមាជិកសហព័ន្ធអ្នកសារព័ត៌មាន​​​អាស៊ាននៅឆ្នាំ២០១៨ ដែលជាសហព័ន្ធសារព័ត៌មានអាស៊ានតែមួយគត់នៅក្នុងតំបន់៕