ព្រឹកនេះ សម្តេចធិបតី ហ៊ុន ម៉ាណែត អញ្ជើញសម្ពោធដាក់ឱ្យប្រើប្រាស់ ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ
សារព័ត៌មាន Cambodia News/
ភ្នំពេញ៖ នៅព្រឹកថ្ងៃទី២៧ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ។
ទឹកសំណល់កខ្វក់ដែលបានកើតឡើងនៅក្នុងរាជធានីភ្នំពេញ បានកើនឡើងយ៉ាងឆាប់រ៉ហ័សដោយសារកំណើនប្រជាជនក៏ដូចជាហេដ្ឋារចនាសម្ព័ន្ធសំណង់អគារផ្សេងៗ។ ទឹកសំណល់កខ្វក់ក្នុងរាជធានីភ្នំពេញ ត្រូវបានហូរកាត់អាងបង្គន់តាមផ្ទះរបស់គ្រួសារនីមួយៗ និងសំណង់អគារអាជីវកម្ម។ សារធាតុរាវក្នុងអាងបង្គន់ដែលអណ្ដែតខាងលើ ត្រូវបានបង្ហូរចូលបឹងបួរតាមរយៈបណ្តាញលូ និងប្រឡាយហើយត្រូវបានបន្សុទ្ធតាមបែបធម្មជាតិ ប៉ុន្តែនៅក្នុងកម្រិតមួយ។
គម្រោងនេះមានគោលដៅសាងសង់ស្ថានីយប្រព្រឹត្តកម្មទឹកកខ្វក់ បំពង់លូ និងសំណង់ស្ទាក់បូមបញ្ជូនទឹកកខ្វក់ដោយផ្អែកលើកម្មវិធីរយៈពេលខ្លីក្នុងការអនុវត្តជាដំណាក់កាលនៅក្នុងគម្រោងមេ។
គម្រោងខាងលើនេះ ត្រូវបានបើកការដ្ឋានសាងសង់កាលពីថ្ងៃទី២២ ខែកុម្ភៈ ឆ្នាំ២០២២ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា។
សំណង់ក្នុងគម្រោងដែលសម្ពោធដាក់ឱ្យប្រើប្រាស់នេះរួមមាន៖
១៖ សំណង់ស្ទាក់ និងបូមបញ្ជូនទឹកកខ្វក់ទៅស្ថានីយប្រព្រឹត្តកម្មទឹកកខ្វក់ជើងឯក ដែលមានសមត្ថភាពបូមបាន ៧ម៉ែត្រគូបក្នុងមួយនាទី។
២៖ ផ្លូវសម្រាប់ថែទាំប្រឡាយ និងសម្រាប់ជីកដាក់បំពង់លូដែកបង្ហូរទឹកកខ្វក់មកស្ថានីយ៍ប្រព្រឹត្តកម្មទឹកកខ្វក់ជើងឯក ប្រវែងប្រមាណ ១,៧០០ម៉ែត្រ ទទឹង ១០ម៉ែត្រ ក្រាលកៅស៊ូ AC។
៣៖ បំពង់លូដែកទំហំ ០.៣ម៉ែត្រ ប្រវែងប្រមាណ ១,៨៤០ម៉ែត្រ ដើម្បីបង្ហូរទឹកកខ្វក់ពីសំណង់ស្ទាក់ និងបូមបញ្ជូនទឹកកខ្វក់មកស្ថានីយ៍ប្រព្រឹត្តកម្មទឹកកខ្វក់ជើងឯក។
៤៖ ស្ថានីយ៍ប្រព្រឹត្តកម្មទឹកកខ្វក់ជើងឯក ដែលមានសមត្ថភាពប្រព្រឹត្តកម្មទឹកកខ្វក់ចំនួន ៥,០០០ម៉ែត្រគូប ក្នុងមួយថ្ងៃ។
គម្រោងទាំងនេះប្រើប្រាស់ថវិកាសរុបប្រមាណ ២,៣៧៧,៧៤៥,០០០យ៉េនជប៉ុន ស្មើនឹងជិត ១៧លានដុល្លារអាមេរិក។ ថវិកានេះ ជាជំនួយរបស់រដ្ឋាភិបាលជប៉ុន៕
