សាកលវិទ្យាល័យ AUPP ទទួលបានការរៀបចំកម្មវិធី អ្នកដឹកនាំវ័យក្មេងអាស៊ានឆ្នាំ២០២២
សារព័ត៌មាន Cambodia News/
ភ្នំពេញ ៖ សាកលវិទ្យាល័យអាមេរិកាំងភ្នំពេញ AUPP នៅព្រឹកថ្ងៃទី១២ ខែតុលា ឆ្នាំ២០២២ នេះបានទទួលការរៀបចំកម្មវិធី អ្នកដឹកនាំវ័យក្មេងអាស៊ានឆ្នាំ២០២២ (ASEAN Young Leaders Program 2022) ដែលមានការអញ្ជើញចូលរួមជាអធិបតីភាពពី ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍។
ក្នុងឱកាសអញ្ជើញជាអធិបតីភាពនេះដែរ ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានសម្តែងនូវការកោតសសើរចំពោះកម្មវិធីអ្នកដឹកនាំវ័យក្មេងអាស៊ាន និងសាកលវិទ្យាល័យ AUPP សម្រាប់គំនិតផ្តួចផ្តើមនិងរៀបចំព្រឹត្តិការណ៍ដ៏មានសារៈសំខាន់ ក្នុងតំបន់អាស៊ាន និងយុវជនកម្ពុជា។នៅថ្ងៃនេះ។
ឯកឧត្តមបណ្ឌិត បន្តថា ចំណុចអាទិភាពមួយក្នុងចំណោមអាទិភាពសំខាន់បំផុតរបស់អាស៊ាននៅពេលនេះគឺការរៀបចំអ្នកដឹកនាំសម្រាប់ថ្ងៃអនាគត ដើម្បីអភិវឌ្ឍផ្នត់គំនិតភាពជាអ្នកដឹកនាំ បណ្តាញទំនាក់ទំនង និងស្វែងយល់អំពីវប្បធម៌ក្នុងតំបន់ ហើយនេះគឺជាលើកទីមួយសម្រាប់ការរៀបចំកម្មវិធីដ័ល្អនេះ ដែលកម្មវិធីនេះធ្លាប់បានធ្វើឡើងនៅក្នុងប្រទេសសិង្ហបុរី ដូច្នេះហើយកម្មវិធីនេះគឺធ្វើឡើងជាលើកដំបូងនៅកម្ពុជា ដែលកំពុងដំណើរការនៅសាកលវិទ្យាល័យ AUPP នាពេលនេះ ។
ឯកឧត្តមបណ្ឌិត ក៏បានលើកឡើងថា យុវជនគឺជាទ្រព្យសម្បត្តិរបស់ប្រទេសជាតិ ក្នុងនាមជាអ្នកដឹកនាំនាពេលអនាគត ពួកគេអាចដឹកនាំប្រទេសមួយឱ្យមានភាពរុងរឿង និងរីកចម្រើនបានក្នុងយុគសម័យឌីជីថលភាវូបនីយកម្ម យុវជនគឺជាអ្នករៀនដ៏រហ័សរហួន ហើយប្រព័ន្ធឌីជីថលឥឡូវនេះត្រូវបានប្រើប្រាស់ជាមធ្យោបាយសម្រាប់យុវជនដើម្បីចូលរួមក្នុងកិច្ចសន្ទនានយោបាយ ប្រជាពលរដ្ឋ និងសង្គម។
គូរបញ្ជាក់ថា សាកលវិទ្យាល័យអាមេរិកាំងភ្នំពេញ AUPP បានសហការណ៍ជាមួយ នឹងអង្គការ Common Purpose ដែលទទួលបានការគាំទ្រពីសំណាកក្រុមប្រឹក្សាយុវជនប្រទេសសិង្ហបុរី ក្នុងការរៀបចំកម្មវិធីអ្នកដឹកនាំវ័យក្មេងអាស៊ានឆ្នាំ២០២២ ចាប់ពីថ្ងៃទី១២ ដល់ថ្ងៃទី១៤ ខែតុលា ឆ្នាំ២០២២នេះ នៅមជ្ឈមណ្ឌលបច្ចេកវិទ្យា AUPP ដែលមានការចូលរួមពីយុវជនចំនួនប្រមាណ១៥០រូប ដែលមានអាយុចាប់ពី១៨ឆ្នាំ ដល់២៥ឆ្នាំ មកពីប្រទេសនានាក្នុងតំបន់អាស៊ាន ដើម្បីពិភាក្សាលើប្រធានបទដែលពាក់ព័ន្ទ ជាពិសេសគឺការកើនឡើងនៃឌីជីថល។
ការរៀបចំកម្មវិធីអ្នកដឹកនាំវ័យក្មេងអាស៊ានឆ្នាំ២០២២ នេះឡើងគឺបង្ហាញអំពីការយកចិត្តទុកដាក់ពីសំណាកសាកលវិទ្យាល័យល្បីនៅកម្ពុជាក្នុងការជំរុញដល់និសិត្សកម្ពុជាគ្រប់រូបមានឱកាសអភិវឌ្ឃសមត្ថភាពជំនាញដឹកនាំ ពិសេសក្នុងការដោះស្រាយបញ្ហានានា ដែលកំពុងប្រឈមក្នុងតំបន់៕ ដោយ ៖ ហេង នាង
