សម្តេចតេជោ ៖ ការចាក់វ៉ាក់សាំងជំងឺកូវីដនៅកម្ពុជា មិនប្រកាន់និន្នាការនយោបាយឡើយ
សារព័ត៌មាន Cambodia News/
ថ្ងៃចេញផ្សាយៈ June 13, 2022/
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានលើកឡើងថា វ៉ាក់សាំងកូវីដ-១៩ នៅកម្ពុជា គឺជាវ៉ាក់សាំងមនុស្សធម៌ សប្បុរសធម៌ ដែលប្រជាជនណាក៏ដោយ ,មាននិន្នាការនយោបាយអ្វីក៏ដោយ, មានជំនឿសាសនាណាក៏ដោយ សុទ្ធតែ អាចទទួលបានវ៉ាក់សាំងកូវីដ-១៩ ដោយស្មើភាព និងគ្មានការរើសអើង។
សម្តេចតេជោ ហ៊ុន សែន បានលើកឡើងបែបនេះនៅព្រឹកថ្ងៃទី១៣ ខែមិថុនា ឆ្នាំ២០២២ ក្នុងពិធីបិទវគ្គបណ្តុះបណ្តាលឆ្នាំ២០២០-២០២១ និងបើកវគ្គបណ្តុះបណ្តាលឆ្នាំ២០២២ របស់សាលាភូមិន្ទរដ្ឋបាល ជាង២ពាន់នាក់ បន្ទាប់បានបញ្ចប់ការសិក្សាដោយជោគជ័យ។
សម្តេចតេជោ ហ៊ុន សែន បានបញ្ជាក់ថា ចាប់គិតតាំងពីថ្ងៃទី២៩ ខែឧសភា ឆ្នាំ២០២២មក អ្នកចាក់វ៉ាក់សាំងកូវីដ១៩ដូសទី៥ បានជិត១០ម៉ឺននាក់ហើយ ដូច្នេះអ្នកចាក់ដូសទី៣ហើយ ត្រូវចាក់ដូសទី៤ ដើម្បីបានបន្តមកចាក់ដូសទី៥។
សម្តេចតេជោ ហ៊ុន សែន បានបញ្ជាក់បន្ថែមថា កម្ពុជាបានប្រើអស់សមត្ថភាព កម្លាំងកាយចិត្ត និងលទ្ធភាព ដើម្បីធ្វើសង្គ្រាមប្រឆាំងនឹងកូវីដ-១៩ បើយើងគ្មានសិល្បៈ ក្នុងការចាក់វ៉ាក់សាំងទេ យើងក៏មិនអាចធ្វើឱ្យមានភាពស៊ាំក្នុងសហគមន៍បានដែរ៕