ក្រុមហ៊ុនវ័នរ៉ូដគ្រុប (ខេមបូឌា) បាននាំអំណោយចែកជូនដល់កុមារកំព្រាក្នុងឱកាសទិវាកុមារអន្តរជាតិ
សារព័ត៌មាន Cambodia News/
ថ្ងៃចេញផ្សាយៈ June 2, 2022/
ព័ត៌មានជាតិ ៖ នាថ្ងៃទី១ ខែមិថុនា ឆ្នាំ២០២២ ដែលជាថ្ងៃខួបលើកទី៧៣ នៃទិវាកុមារអន្តរជាតិ ១មិថុនា ក្រុមហ៊ុនវ័នរ៉ូដគ្រុប (ខេមបូឌា) បាននាំយកអំណោយចែកដល់មណ្ឌលកុមារកំព្រាចំនួន៣ដើម្បីចូលរួមជួយសម្រួលទុក្ខលំបាក និងការខ្វះខាត ជាពិសេសផ្ដល់ក្តីស្រលាញ់ដល់កុមារកំព្រា ដែលកំពុងសិក្សារៀនសូត្រក្នុងមណ្ឌល។
ការចែកអំណោយនេះបានធ្វើឡើង នៅមណ្ឌលកុមារកំព្រាចំនួន៤ ដោយទី១ នៅមណ្ឌលកុមារកំព្រាភូមិខៃស៍ នៃអង្គការឧបត្ថម្ភកុមារកំព្រា ដែលស្ថិតនៅភូមិ១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ , ហើយទី២ នៅមណ្ឌលកុមារកំព្រាខេត្តតាកែវ ស្ថិតនៅភូមិ៣ ឃុំរកាក្នុង ក្រុងដូនកែវ ទី៣ នៅមណ្ឌលកុមារកំព្រាខេត្តកំពង់ចាមស្ថិតនៅ ភូមិនាងគង្ហីង សង្កាត់សំបួរមាស ក្រុងកំពង់ចាម ខេត្តកំពង់ចាម និងទី៤ នៅមណ្ឌលកុមារកំព្រាសេចក្តីសង្ឃឹមថ្មី ស្ថិតនៅភូមិព្រៃឈរ ឃុំព្រៃឈរ ស្រុកព្រៃឈរ ខេត្តកំពង់ចាម។
អំណោយ ដែលក្រុមហ៊ុនវ័នរ៉ូដគ្រុប (ខេមបូឌា) ចែកជូនដល់មណ្ឌលកុមារកំព្រាទាំង ៤មណ្ឌលខាងលើ ក្នុង១មណ្ឌលទទួលបាន អង្ករ២៥គីឡូ ស្មើរនឹង ៤០បាវ, ទឹកសុទ្ធ ១០០កេស, កាតាប (សៀវភៅ និងសំភារៈសិក្សាមួយចំនួន), ប្រេងឆាចំណុះ៥លីត្រ ៥កេស និងនំចំណីមួយចំនួន។
នៅក្នុងឱកាសចែកអំណោយដល់មណ្ឌលកុមារកំព្រានេះ កញ្ញា JOJO ZHANG ដែលជាអគ្គនាយករងនៃក្រុមហ៊ុនវ័ន រ៉ូដគ្រុប (ខេមបូឌា) បានលើកឡើងថា ខ្ញុំពិតជាមានអារម្មណ៍សប្បាយចិត្ត និងរីករាយនៅពេលដែលឃើញកុមារកំព្រាទាំងអស់ទទួលបានការរៀនសូត្រ ។
កញ្ញា JOJO ZHANG បានបន្តថា ទាក់ទងនឹងសកម្មភាពសប្បុរសធម៌នេះកន្លងមកគឺគាត់បានធ្វើច្រើនកន្លែងមកហើយ ដោយសារក្រុមហ៊ុន វ័នរ៉ូដគ្រុប ជាក្រុមហ៊ុនមួយនៅប្រទេសអារ៉ាបរួម ដោយទៅដល់ទីណាគឺគាត់តែងតែបានធ្វើសកម្មភាពសប្បុរសធម៌នៅទីនោះ។
ដើម្បីចូលរួមជួយសម្រួលទុក្ខលំបាក និងភាពខ្វះខាតទៅដល់ប្រជាជន និងជួយឲ្យកុមារទទួលបានការសិក្សារៀនសូត្រ កញ្ញា JOJO ZHANG បានបន្ថែមទៀតថា ក្រុមហ៊ុនវ័នរ៉ូដគ្រុប (ខេមបូឌា) នឹងបន្តខិតខំជួយបន្ថែមទៀតដូចជាសម្ភារសិក្សាដល់កុមារ នឹងគ្រឿងឧបភោគបរិភោគ ទៅកន្លែងផ្សេងៗទៀតដែលជួបនឹងភាពខ្វះខាត។
សូមបញ្ជាក់ជូនថា ក្រុមហ៊ុនវ័នរ៉ូដគ្រុប (ខេមបូឌា) នៅកម្ពុជា គឺធ្វើការទៅលើផ្នែកពាណិជ្ជកម្មអន្តរជាតិ, ប្រេង និង ឧស្ម័ន, បច្ចេកវិទ្យាដ៏ឆ្លាតវ័យ, ទេសចរណ៏អន្តរជាតិ,យាន្តដ្ឋានជួលជុលរថយន្ត, ផ្នែកពត៌មាន, សេវាកម្មជួលរថយន្ត, និងវិនិយោគ៕
