គ.ជ.ប ប្រជុំផ្សព្វផ្សាយសាកល្បងទឹកខ្មៅលុបមិនជ្រះសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ ខាងមុខនេះ
សារព័ត៌មាន Cambodia News/
ថ្ងៃចេញផ្សាយៈ May 13, 2022/
ភ្នំពេញ ៖ នៅព្រឹកថ្ងៃទី១៣ ខែសឧភា ឆ្នាំ២០២២នេះ ដើម្បីឱ្យភាពជឿជាក់លើគុណភាពទឹកខ្មៅលុបមិនជ្រះនេះ គ.ជ.បបានរៀបចំកិច្ចប្រជុំផ្សព្វផ្សាយជូនភាគីពាក់ព័ន្ធពីការសាកល្បងទឹកខ្មៅលុបមិនជ្រះ ដែលត្រូវប្រើប្រាស់សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២»។
មុននឹងបង្ហាញ និងផ្តល់ជូនភាគីពាក់ព័ន្ធសាកល្បងអំពីគុណភាពទឹកខ្មៅលុបមិនជ្រះនេះ លោក ហ៊ែល សារ៉ាត់ មន្ត្រីជាន់ខ្ពស់ គ.ជ.ប សូមជម្រាបជូនដល់ភាគីពាក់ព័ន្ធអំពីថាទឹកខ្មៅលុបមិនជ្រះដែលអាចមើលឃើញច្បាស់ ត្រូវបានដាក់បញ្ញត្តិឱ្យប្រើក្នុងការបោះឆ្នោតសម្រាប់បង្ការការបោះឆ្នោតលើសពីមួយដង ពីព្រោះប្រជាពលរដ្ឋដែលមានសិទ្ធិបោះឆ្នោត គឺបោះបានតែមួយសន្លឹកប៉ុណ្ណោះ។
លោក ហ៊ែល សារ៉ាត់ បានបញ្ជាក់ថា កម្រិតជាតិស្ងួតលឿនក្នុងបរិយាកាសមិនអាចលាងសម្អាតឱ្យបានស្អាតល្អភ្លាមៗនោះទេ ដែលអាចធានាបានទាំងគុណភាពប្រើប្រាស់ និងអាចធានាបានទាំងសុខភាពរបស់អ្នកប្រើប្រាស់។ ទឹកខ្មៅលុបមិនជ្រះនេះ មានសុពលភាព ៦ខ គិតចាប់ពីថ្ងៃផលិត។
មន្ត្រីជាន់ខ្ពស់ គ.ជ.ប រូបនេះ បានបន្តអោយដឹងថា បន្ទាប់ពីសាកល្បងគុណភាពរួច នៅក្នុងអំឡុងខែកុម្ភៈ ឆ្នាំ២០២២ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាផលិតជាផ្លូវការនូវទឹកខ្មៅលុបមិនជ្រះសម្រាប់ជ្រលក់ម្រាមដៃ ចំនួនសរុប ៥២,០០០ដប ក្នុង១ដប ចំណុះ ៧០មីលីលីត្រ ពីក្រុមហ៊ុន MYSORE PAINTS & VARNISH LTD. របស់ប្រទេសឥណ្ឌា ។
លោក ហ៊ែល សារ៉ាត់ បានបន្ថែមថា ក្នុងចំនួននេះ គ.ជ.ប បែងចែកដូចទី១ ផ្តល់ជូនក្នុងមួយការិយាល័យបោះឆ្នោត២ដប ហើយបម្រុងរក្សាទុកនៅគណៈកម្មការរាជធានី ខេត្តរៀបចំការបោះឆ្នោត (គធ.ខប) ៨០០ដប ដើម្បីដោះស្រាយពេលមានតម្រូវការចាំបាច់ និងរក្សាទុកនៅ គ.ជ.ប មួយចំនួន។
សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នឹងធ្វើឡើងនៅថ្ងៃទី៥ ខែមិថុនា ឆ្នាំ២០២២ ខាងមុខនេះ ដែលមានគណបក្សនយោបាយចំនួន១៧ បានចូលរួមប្រកួតប្រជែងក្នុងការបោះឆ្នោត៕
