សម្តេចតេជោ លើកឡើងថា ក្នុងចំណោម​អ្នកស្លាប់​ដោយកូវីដម្សិលមិញ គឺមានអ្នកមិនព្រមចាក់វ៉ាក់សាំង

ភ្នំពេញ ៖ ​តាមការបង្ហោះនៅលើទំព័រហ្វេសប៊ុកឯកឧត្តម​ ខៀវ កាញារីទ្ធ រដ្ឋ​មន្ត្រី​ក្រសួងព័ត៌មាន​​​ ​បាន​ឲ្យ​ដឹង​ថា ក្នុងកិច្ចប្រជុំ​គណៈ​រដ្ឋមន្រ្តីព្រឹកថ្ងៃ​ទី​៨ ខែតុលា នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បាន​លើកឡើងថា ក្នុងចំណោម​អ្នកដែល​បានស្លាប់​ដោយ​សារជំងឺកូវីដ១៩ ម្សិលមិញ គឺមានអ្នក​ដែលមិនព្រមចាក់វ៉ាក់សាំង និងបំផុសគេមិនឱ្យចាក់ទៀតផង។ ​

សម្តេចនាយករដ្ឋមន្រ្តី លើកឡើង​ទៀតថា៖ «ក្រោយពីការស្រាវជ្រាវ ឃើញថាឪពុកគាត់ និង គ្រួសារ មិនបានចាក់ដែរ ។ យើងត្រូវពន្យល់អ្នកមិនទាន់ចាក់អោយគាត់យល់ពីសារសំខាន់នៃការចាក់វ៉ាក់សាំង ទោះជាគាត់នៅក្នុងក្រុមណាក៏ដោយ»។

សម្រាប់ការ​ចាក់វ៉ាក់សាំងជូន​ប្រជាជន គិតត្រឹមថ្ងៃទី៧ តុលា កម្ពុជាបាន​សម្រេចការ​ចាក់វ៉ាក់សាំង​បានចំនួន​ជាង ១៣,៤៥លាននាក់ ស្មើនឹង ៨៤,១១ភាគរយ​នៃប្រជាជន​សរុប​ ១៦លាននាក់៕